Ақмола облысында 4 адамның бруцеллез жұқтырғаны анықталды

КӨКШЕТАУ. KAZINFORM - Ақмола облысының тұрғындары арасында жыл басынан бері бруцеллез жұқтырудың төрт жағдайы анықталды. 

Ақмола облысы бойынша санитарлық-эпидемиологиялық бақылау департаменің мәліметінше, 2024 жылдың жеті айында ақмолалықтар арасында құтыру, сібір жарасы, Конго-Қырым геморрагиялық қызбасы, туляремия эпидемиологиялық аурулары тіркелген жоқ. Алайда, осы кезеңде облыста адамдар арасында бруцеллездің жұқтырудың дерегі тіркелді.

«Ақмола облысының тұрғындары арасында жыл басынан бері бруцеллез жұқтырудың төрт жағдайы анықталды. Алайда, бұл өткен жылдың (былтыр жеті адамның шалдықты) сәйкес кезеңімен салыстырғанда біршама төмен. Бруцеллезбен сырқаттанушылық Бұланды, Астрахан, Целиноград аудандарында және Көкшетау қаласында тіркелді. Барлық науқастар 14 жастан асқан. Екі жағдайда инфекция көзі ірі қара малда болды, қалған екеуінде инфекция көздері анықталмады. Сонымен бірге, байланыста болған 12 адам анықталды, серологиялық әдіспен бруцеллезге тексерілді, оң нәтиже анықталған жоқ», — деді Ақмола облысы Бас мемлекеттік санитарлық дәрігерінің орынбасары Серік Омарханов.

Айтуынша, инфекция ошақтарында мал шаруашылығы өнімдеріне зертханалық бақылау жүргізіліп жатыр.

Айта кетсек, бұдан бұрын Ақмола облысында жыл басынан бері 268 адамды кене шаққанын жазған едік.