Ақмола облысында мал дәрігерлеріне су жаңа 19 автокөліктің кілті табыс етілді
КӨКШЕТАУ. KAZINFORM – Ақмола облысының әкімі Марат Ахметжанов аудандық ветеринария бөлімдерінің басшыларына су жаңа 19 қызметтік автокөліктің кілті табыс етті.
Салтанатты шарада облыс басшысы ветеринария саласының стратегиялық маңыздылығын атап өтті.
«Сіздердің қызметтеріңіз ет және сүт өнімдерінің сапасын бақылауды қамтамасыз ету, сондай-ақ жануарлар арасында қауіпті аурулардың таралуының алдын алу арқылы халықтың денсаулығына тікелей әсер етеді», - деді Марат Ахметжанов.
Әкімнің айтуынша, соңғы жылдары ветеринарлық қызметтердің материалдық-техникалық базасын жақсарту жұмыстары біртіндеп шешіліп келеді.
Жаңа көліктерден басқа, планшеттер, модульдік ветеринариялық пункттер сатып алынды және үлгілік мал қорымдарының құрылысы жүргізіліп жатыр. Мұның бәрі ветеринарлар жұмысының тиімділігін арттыруға және халыққа көрсетілетін қызметтердің сапасын жақсартуға, эпизоотиялық және эпидемиологиялық жағдайды тұрақтандыруға, кадр мәселесін шешуге бағытталған.
«Аудандардағы ветеринарлық станцияларға техникалар 10 жыл бұрын жаңартылған болатын. Қазір олардың көбі ескірді. Қыстың қары мен жаздың жаңбырлы күндері ескі көліктермен шалғай ауылдарға қатынау қиынға соғады. Бүгінгі беріліп отырған жаңа автокөліктер осы мәселені шешуге септігін тигізеді», - дейді Ерейментау ауданының ветеринариялық станциясының басшысы Орал Төлеуов.
Айта кетейік, Ақмола облысында 19 мемлекеттік ветеринариялық ұйым, ауылдық жерлерде 217 ветеринариялық пункт жұмыс істейді.
Еске салайық, бұдан бұрын Ақмола облысында 4 адамның бруцеллез жұқтырғаны анықталғанын жазған едік.
