Ақмола облысының жабық жолдарында 1400-ден аса адам қалып қойды

АСТАНА. KAZINFORM — Ақмола облысының жабық жолдарында 100-ден астам полицей қызметкері жүргізушілердің қауіпсіздігін қамтамасыз етеді, деп хабарлайды Polisia.kz.

жолда қалып қойған көліктер
Фото: Polisia.kz

Қазіргі уақытта өңірде автожолдың 10 учаскесінде қозғалысқа шектеу қойылды: Астана — Ерейментау — Шідерті, Астана — Петропавл, Екатеринбург — Алматы — Аршалы ауданының аумағы, Астана — Қабанбай батыр — Нұра — Теміртау, Көкшетау — Атбасар, Екатеринбург — Алматы, Қостанай — Әулиекөл –Сурған, Жезқазған — Петропавл, Щучинск –Зеренді және Астана — Қорғалжын.

— Ауа райына байланысты департаменттің саптық құрылымының жеке құрамы күшейтілген режимде жұмыс істейді. Патрульдік полиция экипаждары жол-көлік оқиғаларын болдырмау және жүргізушілерді ескерту бойынша қажетті шараларды қабылдауда. Халықаралық, республикалық және облыстық маңызы бар трассаларда 50 автопатруль қызмет атқарады, бұл 100-ден астам полиция қызметкері, — делінген хабарламада.

Ықтимал төтенше жағдайларды болдырмау және қарлы тұтқында қалмау үшін Ақмола облысының полиция департаменті жүргізушілерді жоғарыда аталған бағыттарға бармауға және жолдардағы жағдай туралы ресми хабарламаларды қадағалауға шақырады.

Айта кету керек, қазір жабық жолдарда 700-ге жуық автокөлік пен 1400-ден астам адам қалды. Полицейлер азаматтар мен көлік құралдарының қауіпсіздігін тәулік бойы қамтамасыз ететін болады.

Сонымен қатар, полиция қызметкерлері белсенді азаматтарға, «Лидер.кз» және «Жастар ресурстық орталығына» ерекше алғысын білдірді, олар жолда қалып қойғандарды ыстық шай мен тамақпен қамтамасыз етіп жатыр. Полицейлер тек бірлескен күш-жігер табиғаттың кез келген қиындықтарын жеңуге көмектесетінін атап өтті.

Бұған дейін хабарлағанымыздай, боранға байланысты Қазақстанның 11 облысында жолдар жабылды.

Соңғы жаңалықтар