Ақмола облысында 100-ге жуық жылқыны айдап әкеткен барымташылар ұсталды
КӨКШЕТАУ. ҚазАқпарат - Ақмола облысында 91 жылқыны айтап әкеткен барымташылар тобы ұсталды, деп хабарлайды ҚазАқпарат тілшісі.
ІІД баспасөз қызметінің мәліметі бойынша Аршалы және Целиноград ауданының ІІБ қызметкерлері Аршалы ауданының Жібек жолы ауылы тұрғынының қорасынан ұрланған жылқыларды тапқан.
Кейін жылқылардың 2-ші қазан күні Қарағанды облысындағы Нұра ауданы Ахмет ауылынан жайылып жүрген жерінен ұрланғаны анықталды. Жедел-іздестіру шарасы барысында күдіктілердің бір үйір жылқыны Аршалы ауданындағы Жібек жолы ауылына жасырғаны белгілі болды. Артынша, Жібек жолы және Сарыоба ауылдарында осы қылмысқа қатысты 4 күдікті ұсталды. Күдіктілердің еш жерде жұмыс істемейтіні анықталды. Оған қоса, астаналық 1979 жылғы тағы бір күдікті (шаруа қожалығының басшысы) қолға түсті.
Қазіргі кезде ұрланған жылқылардың бір бөлігі иесіне қайтарылды. Сондай-ақ, осы ұрлыққа байланысты қозғалған қылмыстық іс материалдары Қарағанды облысының Нұра аудандық ІІБ жолданды.
Жалпы, жыл басынан бері Ақмола облысы аумағында мал ұрлығына қатысты 150 қылмыстың беті ашылды.
