Ақмола облысында ер адам баланы құтқарамын деп суға батып кетті

АСТАНА. ҚазАқпарат – 1958 жылы туған ер адам Щучье қаласы көлінің қарама-қарсы жағында батып бара жатқан баланы құтқарамын деп, суға кетті. Бала аман қалды, деп хабарлайды ҚазАқпарат Ақмола облысы Төтенше жағдайлар департаментінің баспасөз қызметіне сілтеме жасап.

Оқиға орнына келген құтқарушылар ер адамды жағаға апарып, жедел жәрдем келгенге дейін жүрекке массаж жасау арқылы алғашқы медициналық көмек көрсетті. Өкінішке қарай, оны құтқару мүмкін болмады.

Ақмола облысы Төтенше жағдайлар департаменті облыстың тұрғындары мен қонақтарына судағы қауіпсіздік ережелерін сақтауды ескертеді.

Айта кетейік, бұған дейін Бурабай көліне батып кете жаздаған әкелі-балалы екі ер адам құтқарылғанын жазған едік. Екатеринбургтен келген туристер қатты желдің кесірінен SUP-тақтасынан ауып, суға құлап кеткен. Туристерді жергілікті құтқарушылар құтқарып, жағаға шығарған еді.