Ақмола облысында «Санитарлық тазалық айлығы» жарияланды

КӨКШЕТАУ. Қыркүйектің 15-і. ҚазАқпарат /Жанмұрат Жанайдаров/ -Ақмола облысының әкімі Сергей Дьяченконың өкімімен ағымдағы жылдың 15-ші қыркүйегі мен қазанның 15-і аралығында «Санитарлық тазалық айлығы» жарияланды, деп хабарлайды ҚазАқпарат тілшісі облыс әкімінің баспасөз қызметіне сілтеме жасап

Айлық аясында аудан орталықтарының, қалалар мен ауылдардың тазалығына, абаттандыру мен көгалдандыру шараларына ерекше мән берілетін болады. Соған сәйкес облыс әкімінің орынбасары Қосман Айтмұхаметовтың жетекшілігімен жұмыс тобы жасақталып, іс-шаралар айқындалды. Байқау қорытындысы бойынша «Үздік аудан орталығы», «Үздік ауылдық округ», «Үздік елдімекен», «Үздік тұрғын үй кооперативі», «Үздік үй» номинацияларына сәйкес жүлдегерлер анықталып, сый-құрметке бөленбек. Іс-шара екі кезеңнен тұрады: біріншіде аудандық, қалалық, екінші кезеңде облыстық жарыс жеңімпаздары анықталмақ.