Ақмола облысындағы «ҚазОрман» ағаш өңдеу кәсіпорны өндіріс көлемін 8 мың текше метрге ұлғайтты

КӨКШЕТАУ. ҚазАқпарат - Ақмола облысының Ақкөл қаласындағы «ҚазОрман» ағаш өңдеу кәсіпорыны өндіріс көлемін 8 мың текше метрге ұлғайтты. Бұл туралы облыс әкімі Сергей Кулагиннің өңірге жұмыс сапары барысында белгілі болды, деп хабарлады облыс әкімінің баспасөз қызметінен.

Еске сала кетсек, аталған зауыт 2009 жылы «Үдемелі индустриялық- инновациялық даму» мемлекеттік бағдарламасы шеңберінде іске қосылған болатын. Кәсіпорында қазіргі заманғы технология бойынша еуропалық стандарттарға сай ағаштан үй, терезе жақтаулары мен есіктер тәрізді түрлі құрылыс материалдары шығарылады. Бұл - еліміздегі орман шаруашылығы саласындағы жоғары қарқынмен дамып отырған алғашқы қарлығаштарының бірі. 2014 жылы кәсіпорында жаңғырту жұмыстары қолға алынып, өндіріс көлемі 8 мың текше метрге дейін артты. Сонымен қатар, зауытта жергілікті 100 адам жұмыс істейді. «Бизнестің жол картасы-2030» мембағдарламасы шеңберінде кәсіпорынға 280 миллион теңге көлемінде субсидия бөлінген. Осының арқасында бүгінгі күні кәсіпорын өнімдеріне деген сұраныс жоғары.