Ақмола облысындағы мектептердің материалдық-техникалық базасы алдағы оқу жылына 100 пайыз дайын
Бұл туралы бүгін Көкшетауда өткен педагогика қызметкерлерінің тамыздық пленарлық кеңесінде облыс әкімі Сергей Кулагин мәлім етті.
Оның айтуынша 2005-2015жылдар аралығында облыстағы білім беру мекемелерінің 686-на күрделі жөндеу жұмыстары жүргізілген. Осы мақсатта 11,7 миллиард қаржы жұмсалған. Биылғы жылы жалпы құны 1,5 миллиард теңгеге 15 білім ордасы жөндеуден өтті.
«Соңғы 10 жыл ішінде жалпы құны 3,5 миллиард теңгеге 905 кабинет қазіргі заманғы оқу құралдарымен жабдықталды. Биылғы жылы 97,5 миллион теңгеге осындай 22 кабинет жабдықталып отыр. Жалпы, алдағы оқу жылына оқушылардың оқулықтармен жабдықталуы және мектептердің материалдық-техникалық базасының дайындығы 100 пайыз болып отыр», деді аймақ басшысы.
Еске сала кетейік, бүгін Көкшетауда ұйымдастырылыған педагогика қызметкерлерінің тамыздық пленарлық кеңесіне ҚР Білім және ғылым вице-министрі Бибігүл Асылова, облыс әкімі Сергей Кулагин мен оның орынбасарлары, өңірдегі аудандар мен қалалардың әкімдері, салалық департаменттер мен басқармалардың басшылары, жергілікті білім ордаларының басшылары мен ұстаздары қатысты.