Ақмолада «Бұрымды қыз» облыстық байқауының жүлдегерлері анықталды
Ақмола облысы мәдениет басқармасы баспасөз қызметінің мәліметінше, Көкшетауда ұйымдастырылған байқауға облыстың қалалары мен аудандарында іріктелген16-25 жас аралығындағы 12 ару қатысып, бақ сынады.
Ұйымдастырушылардың айтуынша, байқаудың мақсаты - ұмыт болуға айналған ұлттық төл мәдениетіміз бен өнерімізді қайта тірілтіп, салт-дәстүрді жаңғырту, әсіресе қыз балалардың жан дүниесіндегі көркемдік талғамын қалыптастыру арқылы әділеттікке, инабаттылыққа, ізеттілікке тәрбиелеу. Сондай-ақ ақылды да ажарлы, талантты, бұрымды қыздарды елге таныстыру, ең шашы ұзын қызды анықтау, қазақ қызына тән, мінез-құлықты дәріптеуді көздеген.
«Ежелгі заманнан бері бұрым - әйелдердің әшекейі саналды. Қазақ қыздарының сұлулығын шаш ұзындығымен және шаштың жібектілігімен шабыттанған ақындар мен композиторлар әнмен жырлаған. Қазақ халқының дәстүрлі құндылықтарын насихаттау, салт-дәстүрлерді жаңғырту, көркемдік талғамды қалыптастыру және мәдени деңгейді арттыру жастарды тәрбиелеуде маңызды», - деп бөлісті Ақмола облысы мәдениет басқармасының басшысы Айгүл Сәбитова.
Байқау үш кезеңнен тұрды. Біріншісінде қыздар бейне слайдтар арқылы өздері және отбасы туралы айтты.
Екінші – «Білікті қыз» аталымында қатысушылар салт-дәстүрлерге қатысты сұрақтарға жауап беріп, мақал-мәтелдерді жалғастырды.
Үшінші кезеңде «Қыз-елдің көркі» байқауда ұлттық киімде дефиле көрсетті.
Қыздардың бұрымының ұзындығын «Шолпысы әсем жарасып белге» аталымында анықтады.
Байқау қорытындысы бойынша Жақсы ауданынан келген София Жолдыбай Гран-при иегері атанды. «Білікті қыз» аталымы бойынша Ерейментау ауданынан Дильназ Әлмағамбетова, «Көрікті қыз» аталымында Аршалы ауданынан Аружан Ғалымжанова, «Сымбатты қыз» аталымы бойынша көкшетаулық Нұршырақ Бақытбек жеңіске жетті.
Жеңімпаздар дипломдармен және бағалы сыйлықтармен марапатталды.
