Ақордада Мемлекеттік хатшы Қанат Саудабаевтың төрағалығымен ҚР Президенті жанындағы Мемлекеттік наградалар жөніндегі комиссияның отырысы өтті

АСТАНА. Сәуірдің 30-ы. ҚазАқпарат /Айдар Оспаналиев/ - Бүгін Ақордада Мемлекеттік хатшы Қанат Саудабаевтың төрағалығымен Қазақстан Республикасы Президенті жанындағы Мемлекеттік наградалар жөніндегі комиссияның отырысы өтті,

деп хабарлайды ҚазАқпарат. Онда комиссия мүшелері орталық мемлекеттік органдардың «Отан қорғаушылар күні» мейрамы қарсаңында құқық қорғау органдары мен ұлттық қауіпсіздік саласынан мемлекеттік наградаға ұсынылуы тиіс азаматтар жөніндегі ұсыныстарды талқылады. «Еліміздің қарулы күштері мен құқық қорғау органдары республиканың қалалары мен аймақтарында, қоғамның, елдің тыныштығын күзетіп, азаматтардың құқықтары мен бостандықтарын қамтамасыз етіп, мемлекет өміріндегі аса жауапты қызметті абыроймен атқаруда. Осындай қауіпті де қасиетті міндеттерді орындап жүрген азаматтардың саны елімізде мыңдап саналады. Осыған орай жылда дәстүрлі түрде «Отан қорғаушылар күні» қарсаңында Мемлекет басшысының Жарлығымен өздерінің қызметіне деген адалдығымен, ерлігімен ерекшеленген азаматтар мемлекеттік наградаға ұсынылады. Бүгінгі комиссияның басты міндеті де осы. Яғни, мемлекеттік органдардың мемлекеттік наградаға ұсынған азаматтары арасында ең үздіктерін іріктеп, Елбасына ұсыну», - деді Мемлекеттік хатшы. Оның сөзіне қарағанда, комиссия іріктеген азаматтардың тізімі Президентке беріліп, Мемлекет басшысы оған қатысты арнайы Жарлыққа қол қойған соң, мамырдың 7-сі күні наградаға ұсынылған азаматтар Қазақстан Республикасының ордендері және медальдарымен марапатталады.