Ақсай қаласында құбырға су кіруі салдарынан 40 абонент газсыз қалды

ОРАЛ. KAZINFORM — Бөрлі ауданы орталығы Ақсай қаласында оқыс оқиға болды.

Ақсай қаласы әкімдігінен мәлім еткеніндей, шаһарға қарасты Аралтал ауылындағы Ж.Досмұхамедов көшесіндегі тұрғын үйлерде газ берудің тоқтау себебін анықтау мақсатында ауданда арнайы комиссия құрылды.

Комиссия мүшелері 11 наурыз күні сағат 21.00-ден 23.00-ге дейін үйлерді аралап шықты. 

Аралау барысында еріген қар суының үйлерге кіру деректері расталған жоқ. Пәтерлердің бірінде ауыз су құбырынан су аққан. Соның салдарынан пәтерді су басқан. Сол кезде пәтерді жалға алған адам үйінде болмаған.

— Судың төмен қысымды магистральдық газ құбырына кіруі салдарынан 10 жеке тұрғын үйдегі 40 абонент газсыз қалды. Сегіз жалдаушы электр жылытқыш сұрап, қамтамасыз етілсе, қалғандары қажет еместігіне байланысты бас тартты. Құрылыс салушы «Назтур» ЖШС мен «QazaqGaz Aimaq» АҚ аудандық газ қызметі апатты жоюға атсалысуда. Газ беру 12 наурыз күні сағат 14.00-де қалпына келтіріледі деп болжанып отыр. Бұл мәселе апат жойылғанша Бөрлі ауданы әкімдігінің бақылауында, — деп хабарлады ведомстводан.

Әкімдік мәліметіне қарағанда, бұл пәтерлер баспана кезегінде тұрған азаматтарға өткен жылдың желтоқсан айында берілген. Жол салу үшін сметалық құжаттама әзірленіп, жобаны биыл жүзеге асыру жоспарлануда. 

Еске сала кетейік, бұдан бұрын БҚО-да ауылға кіреберісте автокөліктер батпаққа батып жатуына байланысты әкімдік жауап бергенін жазған болатынбыз.

Сондай-ақ Орал қаласында аула-көшелер қар суына тола бастады.