Ақсай қаласында қатты жел дүкеннің шатырын жұлып әкетті

ОРАЛ. ҚазАқпарат – Ақсай қаласында қатты жел дүкеннің шатырын жұлып әкетті, деп хабарлайды ҚазАқпарат тілшісі.

БҚО ТЖ департаментінен түскен мәліметке қарағанда, оқиға 25 сәуір күні қаладағы өндірістік аймақта орын алды.

Екпіні секундына 18 метрге дейін жеткен жел «Стройбат» құрылыс заттары дүкенінің шатырын жұлып түсірген. Оның аумағы 550 шаршы метрді құрады.

Зардап шеккендер жоқ.

Қазіргі кезде оқиғаның жай-жапсары, келтірілген шығын көлемі анықталу үстінде.

БҚО ТЖ департаменті ауа райының бұзылатыны жөнінде барлық әкімдіктер мен коммуналдық мекемелерге, тұрғындарға алдын ала хабарлап келеді.

Еске сала кетейік, бұдан бұрын үш облыста жел күшейіп, үсік жүретіні жөнінде жазған болатынбыз.