АҚШ әскері Газа секторы жағалауында пирс салуды аяқтады
АСТАНА. KAZINFORM – Бейсенбіде АҚШ әскері Газа секторы үшін қалқымалы пирс орнатуды аяқтап, анклавқа қажет гуманитарлық көмекті тасымалдауды бастауға дайын екенін мәлімдеді. Бұл туралы Timesofisrael жазды.
АҚШ әскері бейсенбі күні жергілікті уақыт бойынша таңғы сағат 7:40-та пирске зәкір қойды. Бұл туралы Қарулы күштердің орталық қолбасшылығының мәлімдемесінде айтылды.
Жағалауға жақын күндері гуманитарлық көмек жеткізіле бастауы тиіс.
Сәуір айының соңында АҚШ әскері Газа секторы жағалауында теңіз пирстерін салуға кіріскені хабарланған болатын.
Today at approximately 7:40 a.m. (Gaza time) United States Central Command personnel supporting the humanitarian mission to deliver additional humanitarian aid to Palestinian civilians in need anchored a temporary pier to the beach in Gaza. As part of this effort, no U.S. troops… pic.twitter.com/048seMnkLJ
— U.S. Central Command (@CENTCOM) May 16, 2024
Кипрден Газа секторына көмек жеткізуді көздейтін теңіз жолының мақсаты – Израиль әскері мен палестиналық ХАМАС тобы арасындағы 7 айдан астам қызу шайқас кезінде анклавқа келетін көмек көлемін арттыру.
Кемелер гуманитарлық көмекті Газа қаласының оңтүстік-батысындағы портқа жеткізеді. Оған БҰҰ-ның қандай агенттігі қатысатыны әзірге белгісіз.
Бұған дейін АҚШ соғыс аймағына жақын жерде әрекет ету қаупін мойындағанымен, америкалық әскерилер Газа секторына кірмейтінін бірнеше рет мәлімдеген болатын.
Пентагон шенеуніктері Газа секторындағы шайқастардың жаңа жағалаудағы көмек тарату аймағына қауіп төндірмейтінін айтты, бірақ олар қауіпсіздік мәселелері мұқият қадағаланатынын және теңіз жолының уақытша болса да жабылуына әкелуі мүмкін екенін жеткізді.
