АҚШ Халықаралық қылмыстық сотқа қарсы санкциялар енгізді
АСТАНА. KAZINFORM – Дональд Трамп Халықаралық қылмыстық сотты АҚШ пен оның ең жақын одақтастары, бірінші кезекте Израильді заңсыз қудалады деп айыптап, оған қарсы санкциялар енгізу туралы жарлыққа қол қойды, деп хабарлайды ВВС.
Құжатта америкалықтарға немесе олардың одақтастарына, сондай-ақ отбасы мүшелеріне қарсы тергеуге қатысқан тұлғаларға қаржылық және визалық санкциялар қолданылатыны айтылған.
Трамптың бұл қадамы өткен аптада АҚШ Сенатындағы демократтар республикашылдардың Израиль премьер-министрі Биньямин Нетаньяху мен бұрынғы қорғаныс министрі Йоав Галантты тұтқындауға ордер беруіне наразылық ретінде ХҚС-қа санкция салу әрекетіне тосқауыл қоюынан кейін жасалды.
Нетаньяху қазір Вашингтонда жүр.
- ХҚС Израиль премьер-министрі Биньямин Нетаньяху мен бұрынғы қорғаныс министрі Йоав Галантты қамауға алуға негізсіз ордер беру арқылы өз өкілеттіктерін асыра пайдаланды - делінген жарлықта.
Онда АҚШ пен Израиль «соғыс заңдарын қатаң сақтайтын әскерлері бар гүлденген демократиялық елдер» екені атап өтілген.
- Гаагада орналасқан Халықаралық қылмыстық сот өз қызметкерлерін ықтимал шектеулер жағдайында қызметкерлерге үш айлық жалақысын алдын ала төлеу арқылы АҚШ-тың ықтимал санкцияларынан қорғау шараларын қабылдады, - деп хабарлады Reuters агенттігінің ақпарат көздері.
Бұл - соттың АҚШ-тың жауап шараларымен екінші рет бетпе-бет келуі. 2020 жылы Трамптың бірінші әкімшілігі кезінде Вашингтон ХҚС бас прокуроры Фату Бенсуду мен юрисдикция мәселелері жөніндегі директоры Факисо Бенчохохоға АҚШ-тың Ауғанстандағы болжамды әскери қылмыстарын тергеуге байланысты санкциялар салды.
Қаңтар айында АҚШ Конгресі Өкілдер палатасы ХҚС-қа қарсы санкция салуға дауыс берді, бірақ заң жобасы Сенатта дауыс беруден өткен жоқ.
ХҚС Вашингтон санкцияларын «заң үстемдігіне араласуға жол берілмейтін әрекет» екенін мәлімдеді.
Халықаралық қылмыстық сот 2002 жылы құрылған. 120-дан астам ел ХҚС-тың құқықтық негізі болып табылатын Рим статутын ратификациялады, оған тағы 34 мемлекет қол қойды және болашақта оны ратификациялауы мүмкін.
АҚШ та, Израиль де Рим статутының қатысушылары емес.
Еске салайық, ХҚС – аса ауыр қылмыстармен күресте негізгі орган, бірақ оның шешімдері жиі дау тудырып, халықаралық қауымдастықты поляризациялайды.
Айта кетейік, Халықаралық қылмыстық сот Нетаньяху мен Галантты қамауға алуға ордер бергенін жазғанбыз.
