АҚШ Колумбияны есірткіге қарсы күресте ынтымақтаспайтын елдер қатарына қосты

АСТАНА. KAZINFORM – Трамп әкімшілігі соңғы 30 жылға жуық уақыт ішінде алғаш рет Колумбияны есірткіге қарсы күресте ынтымақтасудан бас тартқан елдер тізіміне қосты, деп хабарлайды Kazinform тілшісі.

Бұл қадам АҚШ-тың Латын Америкасындағы дәстүрлі одақтасына бағытталған қатаң сын болып, кокаин өндірісінің күрт артуы мен Ақ үй мен Колумбия президенті арасындағы қарым-қатынастың нашарлауын айқындады, деп жазады NBC News.

Колумбия есірткіге қарсы күрестегі халықаралық міндеттемелерін орындамағанына қарамастан, Трамп әкімшілігі санкция енгізуден бас тартты. Бұған АҚШ-тың өмірлік маңызы бар ұлттық мүдделері себеп ретінде көрсетілді.

Колумбия президенті Густаво Петро бұл шешімге өкініш білдірді. Ол бірнеше рет «кокаиннен гөрі виски көбірек адам өлімін әкеледі» деп айтқан. Бұрынғы көтерілісші ретінде ол АҚШ-тың жоғары лауазымды шенеуніктерінің наразылығын тудырды: экстрадиция жөніндегі сұрауларды қабылдамай, Трамп әкімшілігінің иммиграциялық заңнаманы қатаңдатуын және көрші Венесуэлада заңсыз есірткі айналымына қарсы күреске бағытталған шараларын сынады.

БҰҰ Есірткі және қылмыс жөніндегі басқармасының соңғы есебіне сәйкес, соңғы он жыл ішінде кока өсірілетін жерлердің көлемі үш есеге жуық артып, 2023 жылы рекордтық деңгейге — 253 мың гектарға жеткен. Бұл Нью-Йорк қаласының аумағынан үш есе үлкен.

Өндіріс көлемімен қатар есірткі тәркілеу де күрт артты: биыл 654 метрлік тонна тәркіленген. Өткен жылы рекорд орнатылып, 884 метрлік тонна есірткі қолға түскен болатын.

Алайда бұрынғы үкіметтерге қарағанда, Петро билігі кезінде кока егістіктерін қолмен жою қарқыны баяулап кеткен: биыл небәрі 5 048 гектар жойылды. Бұл оның консервативті алдыңғысының соңғы жылындағы 68 мың гектардан әлдеқайда аз әрі үкімет қойған 30 мың гектарлық мақсаттан да төмен.

АҚШ Колумбияны бұл тізімге соңғы рет 1997 жылы енгізген болатын.

Бұған дейін АҚШ есірткі тасымалдады деп болжанған венесуэлалық кемеге соққы жасағаны хабарланған.