АҚШ Мемдепартаменті Сауд Арабиясынан дипломаттардың бір бөлігін шығаруды тапсырды
АСТАНА. KAZINFORM - АҚШ Мемлекеттік департаменті қауіпсіздікке төнген қатерге байланысты Сауд Арабиясындағы елшілік қызметкерлерінің бір бөлігін елден шығаруды тапсырды, деп жазады Anadolu Ajansı.
8 наурыздағы нұсқаулықта төтенше міндеттерге тартылмаған қызметкерлер мен олардың отбасы мүшелері туралы айтылған. Бұл жөнінде 9 наурыз, дүйсенбі күні жарияланған елшілік хабарламасынан мәлім болды.
— Бұл түзету 2026 жылғы 3 наурызда берілген АҚШ үкіметінің төтенше міндеттерге қатысы жоқ қызметкерлеріне және олардың отбасы мүшелеріне Сауд Арабиясынан кетуге рұқсат берген Мемлекеттік департамент шешіміне өзгеріс енгізеді. Шара қауіпсіздікке байланысты қабылданып отыр, — делінген хабарламада.
Еске сала кетейік, 3 наурыз күні АҚШ Мемлекеттік департаменті америкалық азаматтарды Таяу Шығыстағы оннан астам елден шұғыл түрде кетуге шақырған болатын.
