АҚШ Мемлекеттік хатшысы Трамптың Газаны басып алу туралы ұсынысынан кейін Таяу Шығысқа барады

АСТАНА.KAZINFORM - АҚШ Мемлекеттік хатшысының бұл сапары Дональд Трамптың Палестина тұрғындарын Газадан көшіру туралы сынға ұшыраған ұсынысынан кейінгі алғашқы сапары болмақ, деп жазады Kazinform-ның меншікті тілшісі.

АҚШ Мемлекеттік хатшысы Марко Рубио ақпан айының ортасында Израиль мен араб елдеріне барады.

Мемлекеттік департаменттің жоғары лауазымды өкілі бейсенбі күні кешке Рубионың 13-18 ақпан аралығында Мюнхендегі қауіпсіздік конференциясына, сондай-ақ Израиль, Біріккен Араб Әмірліктері, Катар және Сауд Арабиясына баратынын айтты.

Америкалық шенеуніктің айтуынша, сапар барысында Рубио Газа секторындағы жағдайды және 2023 жылғы 7 қазанда ХАМАС-тың Израильге жасаған шабуылдарының салдарын талқылайды, сондай-ақ аймақтағы статус-квоны бұзуға бағытталған Трамптың ұстанымын ұстанатын болады.

Құқық қорғау ұйымдары Трамптың Газа секторындағы палестиналықтарды көшіру керек деген ұсынысын айыптады.

Рубио сәрсенбі күні анклавта тұратын палестиналықтарды Израиль мен Газа арасындағы соғыстан кейін қалпына келгенше уақытша көшуге тура келетінін айтты.

25 қаңтардан бері Трамп бірнеше рет Газа секторындағы палестиналықтарды Мысыр мен Иордания сияқты араб елдеріне көшіруді ұсынды. Бұл идеяны араб мемлекеттері мен палестиналықтар қабылдамады. Трамптың ұсынысы үйлерінен біржола қуылуынан қауіптенетін палестиналықтардың бұрыннан келе жатқан қорқынышын үдетті.

Трамп жақында Газада «Таяу Шығыс Ривьерасын» салуды ұсынды.

Трамптың жоспары бойынша, соғыс аяқталғаннан кейін Израиль Палестина анклавын АҚШ-қа береді.

Трамп орта тап үшін бұрын-соңды болмаған төмен салық ұсынған еді.