АҚШ пен Иран арасындағы келіссөздер басталып, үзіліс жарияланды
АСТАНА. KAZINFORM - Тараптар жаңа бастамаларды талқылауға дайын екендерін аңғартқанымен, негізгі мәселелер бойынша әлі де нақты қадам жасалмады. Бұл туралы Kazinform агенттігінің Таяу Шығыстағы меншікті тілшісі хабарлады.
Женева қаласында Тегеранның ядролық бағдарламасына қатысты АҚШ пен Иран арасындағы жанама келіссөздердің кезекті кезеңі басталды. Кездесу Оман сұлтандығының арағайындығымен, Женева көлінің жағасындағы омандық дипломатиялық резиденция аумағында өтіп жатыр.
Иранның Tasnim агенттігі мен мемлекеттік телеарнасының мәліметінше, консультациялар басталғаннан кейін үш сағат өткен соң тараптар кеңесу үшін үзіліс жариялаған. Халықаралық ақпарат құралдары америкалық делегация мінуі мүмкін кортеждің Оман резиденциясы аумағынан шығып кеткенін хабарлады.
Келіссөздерге арағайындық жасап отырған Оманның сыртқы істер министрі Бадр әл-Бусаиди үзіліс жасалғанын растады әрі келіссөздердің барысын оң бағалады.
— Бүгін Женевада біз креативті әрі позитивті идеялармен алмастық. Қазір америкалық және ирандық делегациялар үзіліс алды, келіссөздер кейінірек жалғасады. Бұдан да ілгерілеуге қол жеткіземіз деп үміттенеміз, — деп жазды ол X әлеуметтік желісіндегі парақшасында.
We’ve been exchanging creative and positive ideas in Geneva today, and now both US and Iranian negotiators have adjourned for a break. We’ll resume later today. We hope to make more progress.
— Badr Albusaidi - بدر البوسعيدي (@badralbusaidi) February 26, 2026
Оның айтуынша, талқылаулар нәтижелі әрі тұрақты кепілдік негізінде әділ келісімге келу жолындағы шығармашылық шешімге ашық жағдайда өтіп жатыр.
Келіссөздер қарсаңында Оманның сыртқы істер министрі Бадр әл-Бусаиди АҚШ-тың Таяу Шығыс жөніндегі арнайы өкілі Стив Уиткофф және АҚШ президенті Дональд Трамптың күйеу баласы Джаред Кушнермен жеке кездесу өткізді.
Оман СІМ мәліметінше, тараптар Иранның ұсыныстарын, сондай-ақ америкалық келіссөз тобының сауалдары мен ұстанымдарын талқылаған.
Иран тарапынан Женеваға сыртқы істер министрі Аббас Аракчи келді. Ал Иран Жоғарғы көшбасшысының кеңесшісі Али Шамхани келісімге дереу қол жеткізуге толық мүмкіндік бар екенін мәлімдеді. Оның сөзінше, егер келіссөздердің өзегі Иранның ядролық қару жасамау мәселесімен шектелсе, ортақ мәміле қол созым жерде.
— Егер келіссөздердің басты тақырыбы Иранның ядролық қару шығармау болса, бұл ел көшбасшысының пәтуасына да, қорғаныс доктринасына да сай келеді. Мұндай жағдайда жедел келісімге қол жеткізу әбден мүмкін, — деді Шамхани.
Ол сондай-ақ Аббас Аракчидің мәміле жасауға жеткілікті өкілетке ие екенін атап өтті.
Соған қарамастан уранды байыту мәселесінде тараптардың ұстанымдары әртүрлі болып отыр. АҚШ президенті Дональд Трамп бұған дейін Иранның уран байытуға құқығы болмауы тиіс екенін мәлімдеген. Ал Тегеран өз кезегінде ядролық бағдарламасының заңдылығын алға тартып, оның тек бейбіт мақсатқа бағытталғанын баса айтады.
Иран Сыртқы істер министрлігі америкалық ресми тұлғаларды келіссөзге барынша көңіл бөлуге шақырды.
Ведомствоның атап өтуінше, бұқаралық ақпарат құралдарындағы қарама-қайшы мәлімдемелер, соның ішінде АҚШ мемлекеттік хатшысы Марко Рубионың пікірі дипломатияның ілгерілеуіне негіз бола алмайды.
Ирандық дереккөздер мен AFP агенттігінің хабарлауынша, Женевадағы консультацияларға Халықаралық атом энергиясы агенттігінің бас директоры Рафаэль Гросси де қосылған. Ол келіссөздерге техникалық бақылаушы ретінде қатысып жатыр.
📸 | عقد معالي السيد بدر بن حمد البوسعيدي @badralbusaidi وزير الخارجية لقاءً في مدينة جنيف مع معالي رافاييل غروسي المدير العام للوكالة الدولية للطاقة الذرية، وذلك في إطار التشاور وتبادل وجهات النظر حول المسائل الفنية ذات الصلة بالملف النووي الإيراني والأفكار الجديدة التي هي محل… pic.twitter.com/RrjA28bfuU
— وزارة الخارجية (@FMofOman) February 26, 2026
Бұл келіссөздер Вашингтонның Таяу Шығыстағы әскер санын арттырып, қысымды күшейткен тұсында мәселені дипломатиялық реттеуге берілген соңғы мүмкіндіктердің бірі ретінде бағаланып отыр.
Консультациялар қайта жалғасқаннан кейін тараптар ықтимал келісімнің параметрлері мен оның орындалуына берілетін кепілдіктерді талқылауды жалғастырмақ.
Бұған дейін Иран мен АҚШ 26 ақпанда Женева қаласында келіссөздердің үшінші кезеңін өткізетіні туралы хабарлаған болатынбыз.
