АҚШ-Ресей келіссөзі теңге бағамына әсер ете ме

АСТАНА. KAZINFORM — Ұлттық банк төрағасы Тимур Сүлейменов базалық мөлшерлемеге арналған баспасөз мәслихатында АҚШ-Ресей келіссөзі теңге бағамына қалай әсер ететінін айтты.

— Рубльдің теңгеге шаққандағы бағамы үнемі 5 теңге көлемінде сақталады деу дұрыс емес. Иә, жылдар бойы орташа мөлшерде 5 теңгелік меже бар. Бірақ сіз айтып отырған экономикадағы шайқалыстар уақытша сипатқа ие және экономикаға әсері болады. Санкциялар алынып, Ресей экономикасына жол ашылса, оның әсері Қазақстан экономикасы мен қаржы нарығына қарағанда Ресейге көбірек ықпалын тигізеді, — деді ол.

Ұлттық банктің рубль нарығына қатысты болжамдары оптимистік сипатта.

— Өйткені ушыққан шиеленістер реттелсе, Ресей экономикасына көбірек жағымды әсер етеді. Біз үшін айтарлықтай ештеңе өзгермейді. Сондықтан ресей-америка келіссөзінің теңгеге супер жағымды немесе супер жағымсыз әсерін болжап отырған жоқпыз, — деді ол.

Ал Қазақстанда, Ұлттық банк басшысының айтуынша, базалық мөлшерлеме әлі де көтерілуі мүмкін.