АҚШ-та Дональд Трампты қолдау деңгейі рекордтық төмен көрсеткішке жетті
АСТАНА. KAZINFORM — АҚШ президенті Дональд Трамптың саясатын қолдау деңгейі рекордтық төмен көрсеткішке жетті. Конгресс сайлауына екі апта қалғанда америкалықтардың Демократиялық партияны қолдауы артып келеді. Бұл туралы Report жазды.
Бұл туралы The Washington Post (WP) газеті, ABC телеарнасы және Францияның Ipsos әлеуметтану қызметі бірлесіп жүргізген сауалнама нәтижелерінде айтылған.
Зерттеу деректеріне сәйкес, Дональд Трамптың қызметін қолдау деңгейі 33%-ды құраған. Бұл шілде айындағы көрсеткіштен 4 пайыздық тармаққа, ал 2025 жылғы қазандағы деңгейден 8 пайыздық тармаққа төмен.
АҚШ Конгресінің Өкілдер палатасына бақылау орнату жолындағы бәсекеде демократтар республикашылдардан 8 пайыздық тармаққа озып тұр. Шілде айында бұл айырмашылық 3 пайыздық тармақ болған.
Сауалнамаға қатысушылар республикашылдарға деген наразылықтың негізгі себептері ретінде Трамптың әрекеттері мен Иранға қарсы соғыс салдарынан елде инфляцияның өсуін атаған. Респонденттердің 65%-ы Тегеранға қарсы әскери операцияны қате шешім деп санайды.
Сонымен қатар сауалнамаға қатысқандардың 48%-ы Трамп 2025 жылы президенттік қызметіне қайта оралғаннан кейін өздерінің қаржылық жағдайы нашарлағанын мәлімдеген. Бұл — WP мен ABC 1986 жылдан бері жүргізген сауалнамаларда АҚШ президенттеріне қатысты тіркелген ең жоғары көрсеткіш.
Сауалнама 9–13 қазан аралығында АҚШ-тың 18 жастан асқан 2 545 азаматының қатысуымен өткізілген.
Бұған дейін Трамп Атлант немесе Тынық мұхитын өз атымен атауды ұсынған болатын.
