АҚШ-та қарызына байланысты үйі тәркіленгендер саны артты
АСТАНА.KAZINFORM - Осы жылдың бірінші тоқсанында АҚШ-та шамамен 119 000 мүлік қарыз төлемеу салдарынан сатылымға шығарылды, бұл алдыңғы жылмен салыстырғанда 26%-ға көп, деп хабарлайды FOX Business.
Сақтандыру және мүлік салығының шығыны АҚШ тұрғындарының қалтасын қағып жатқандықтан, үйден айырылғандар саны алты жылдағы ең жоғары деңгейге жетті.
Insurify есебіне сәйкес, 2025 жылы жылжымайтын мүлікті сақтандырудың орташа жылдық шоты 2948 долларға жетті, бұл 2024 жылмен салыстырғанда 12%-ға көп. Attom мәліметі бойынша, мүлік салығының орташа сомасы 3%-ға өсіп, 4427 долларды құрады. Бұл күрт өсім АҚШ-тың бүкіл ипотекалық портфолиосына, соның ішінде 2022 жылға дейін 4% немесе одан төмен мөлшерлемемен несие алған қарыз алушылар тобына әсер етті, ал жаңа сатып алушылар ипотекалық мөлшерлемелердің жоғары болуына байланысты айтарлықтай жоғары төлемдерге тап болады.
Бұған дейін елдегі төленбеген ипотека бойынша орташа айлық төлем 2000 доллардан асқан болатын.
