АҚШ-тағы сайлау: Вашингтон тұрғындарын не мазалайды
АСТАНА. KAZINFORM — АҚШ Конгресіне аралық сайлау ел тұрғындарының демократиялық құқықтарды және өз елінің саяси болашағына тәуелсіз әсер ету мүмкіндігін қорғауға мүдделі екенін көрсетті, деп хабарлайды Kazinform агенттігінің Вашингтондағы меншікті тілшісі.
Вашингтондық сайлаушы Стейси дауыс беру туралы ғана емес, сонымен қатар елдің болашағы жайлы да ой бөлісті. Ол болашақ ұрпақ үшін демократиялық бостандықты сақтай аламыз ба деген сұраққа алаңдайды.
— Мен елдегі демократияны, оның қалай басқарылатынын, оған қалай қамқорлық жасайтынымызды жақсырақ түсініп, келесі ұрпақ үшін олар сайлауда басқа адамдар қалағандай емес, өздері қалағандай дауыс беру мүмкіндігін сақтай аламыз деп үміттенемін, — деді Стейси.
Стейси балаларға сайлауға еркін қатысып, өз шешімдерін қабылдай алатын елді мұра етіп қалдыруға баса назар аударды.
— Мен олардың [балалар] тәуелсіз дауыс бере алуын, үкіметтің бақылауында болмай, өз пікірлерін білдіре алуын, оларға біз не істегіміз келетінін, олардың не істегенін қалайтынымызды айтқым келеді. Бұл біздің қолымыздан келеді деп ойлаймын, — деп атап өтті Стейси.
Вашингтон тұрғыны Алекс Колумбия округіне штат мәртебесін беру мәселесі шешілмей келе жатқанын алға тартып, бұның бұрыннан келе жатқан, қайталана беретін тақырып екенін айтты.
— Қаламыз біздің ел ретіндегі демократиялық құндылықтарымызды қолдайды деп күтемін. Білесіз бе, Колумбия округінің мәртебесі қайта-қайта көтерілсе де шешімін таппай отырған мәселе. Бізде әлі де штат болып еңсе көтеру жолында еңбек етіп келе жатқан талантты адамдар бар, — дейді Алекс.
Оның айтуынша, округ тұрғындары жергілікті сайлауға ұдайы қатысқанымен, АҚШ Конгресінде толық саяси өкілдігі жоқ.
— Біз, әрине жергілікті сайлауға қатысып, өз өмірімізге әсер ете аламыз, бірақ округ болғандықтан толыққанды сайлаушы ретінде құқығымыз шектеулі, — деді Алекс.
Бұған дейін АҚШ Конгресінде билік ауысуы мүмкіндігін, демократтар Өкілдер палатасын бақылауға алып жатқанын хабарлаған едік.
