АҚШ-тың Йеменге әуе соққылары: хуситтер 53 адамның қазасынан кейін шиеленіс ушығатынын ескертті

АСТАНА. KAZINFORM — Хуситтер денсаулық сақтау министрлігінің мәліметінше, сенбі күні АҚШ-тың Йеменге бірнеше әуе соққысынан кейін 53 адам қаза тауып, 98 адам жарақат алды, деп хабарлайды NBC News.

Топ ел астанасы Сана мен Сауд Арабиясымен шекаралас Саад қаласында жарылыс болғанын хабарлады.

Хуситтер өкілі Наср ад-Дин Амердің жексенбі күні жасаған мәлімдемесіне сәйкес, әуе шабуылы құрбандарының көпшілігі әйелдер мен балалар. 

Амер хуситтер операцияларын «Газадағы блокада жойылмайынша жалғастырады. Жақында болған шиеленістің күшеюіне біз одан әрі шиеленіспен жауап береміз» деп мәлімдеді. 

Әуе шабуылы хуситтер Израиль кемелеріне шабуылдарын қайта бастайтындарын айтқан соң бірнеше күн өткен соң жасалды. 

Жексенбі күні Дональд Трамп хуситтерге ескерту жасады.

– Бүгін мен АҚШ қарулы күштеріне Йемендегі хусит-террористерге қарсы батыл әрі қуатты әскери әрекеттерді бастауды бұйырдым. Сіздердің шабуылдарыңыз бүгіннен бастап тоқтауы тиіс. Егер бұлай жасамасаңыздар, сіздер бұрын-соңды көрмеген тозаққа тап боласыздар, – деп жазды Дональд Трамп Truth Social-да.

Трамп сондай-ақ Иранды хусит лаңкестерін қолдамау туралы ескертті, әйтпесе Америка оларды толығымен жауапқа тартатын болады. 

Бұған дейін АҚШ президенті Дональд Трамп америкалық Қарулы Күштерге йемендік көтерілісші хусиеттерге қарсы қуатты соққы беруді тапсырғанын жазған болатынбыз.