АҚШ Йемендегі хуситтер бекінісіне соққы берді
АСТАНА. KAZINFORM — АҚШ науқанына жауап ретінде Йемендік хуситтер жетекшісі шабуылды күшейтуге уәде берді, деп хабарлайды Kazinform тілшісі.
Бейсенбіге қараған түні АҚШ Йеменге әуе шабуылдарын жалғастырды, оның ішінде ел астанасы Сана, Қызыл теңіз жағалауындағы Ходейда порты және Йеменнің хусит жетекшілеріне ұзақ уақыт бойы пана болған Саада провинциясы бар.
Йеменнің хусилермен байланысы бар Al Masirah телеарнасы әртүрлі жерлерге, соның ішінде Сааданың әл-Сафра аймағына 10-нан астам соққы берілгенін хабарлады.
Бұл аймақта қару-жарақ қоймалары мен оқу-жаттығу полигондары бар және топтың ең маңызды және жақсы нығайтылған әскери бекіністерінің бірі саналады, деп хабарлады Reuters йемендік дереккөздерге сілтеме жасап.
Сондай-ақ ел астанасындағы әуежай маңында орналасқан Сананың әл-Джарраф ауданына да шабуылдар жасалды. Сананың әл-Тәура ауданына жасалған соққыдан тоғыз адам, әйелдер мен балалар жараланды. Бұл туралы X әлеуметтік желісінде хуситтердің денсаулық сақтау министрлігінің өкілі Анис әл-Асбахи хабарлады.
Al Masirah телеарнасының хабарлауынша, соққының Йеменнің оңтүстігіндегі әл-Байда провинциясындағы әл-Сувейдия провинциясы да нысанаға алынған. Провинцияда хуситтерге тиесілі әскери нысандар мен қару қоймалары бар екені белгілі.
АҚШ Орталық қолбасшылығы хуситтерге қарсы операцияны тәулік бойы жалғастырып жатқанын мәлімдеді.
CENTCOM forces continue 24/7 operations against the Iran-backed Houthis…#HouthisAreTerrorists pic.twitter.com/RkWsmDgEFR
— U.S. Central Command (@CENTCOM) March 19, 2025
Хусит жетекшілері АҚШ-тың әскери кампаниясына жауап ретінде шабуылдарын күшейтетінін мәлімдеді.
— Қазір Йемен АҚШ-пен соғыс жағдайында екенін көріп отырмыз, бұл өзімізді барлық мүмкін тәсілдермен қорғауға құқығымыз бар дегенді білдіреді. Сондықтан шиеленістің күшеюі ықтимал, — деді хуситтердің сыртқы істер министрі Джамаль Амер Reuters агенттігіне Санадан берген сұхбатында.
Хуситтер үкіметінің Йемен қарулы күштері бейсенбі күні Израильдің теңіз саудасын бұғаттауды жалғастыратынын және Газаны қолдайтынын мәлімдеді. Олар бұл әрекеттерін агрессия тоқтап, анклав қоршаудан шыққанға дейін жалғастыратынын атап өтті.
Сәрсенбі күні хуситтер АҚШ-тың әуе кемесіне тағы бір шабуыл жасады. Ал бейсенбі күні таңертең олар Тель-Авив әуежайында Палестина-2 баллистикалық зымыранын ұшырды. Израиль қорғаныс күштері Йеменнен атылған зымыранды елдің әуе кеңістігіне кірмес бұрын әуе күштері атып түсіргенін хабарлады.
15 наурыз, сенбі күні хуситтердің Қызыл теңіздегі кемелерге жасаған шабуылдарына жауап ретінде басталған соұқылар АҚШ президенті Дональд Трамп қаңтарда билікке келгеннен бергі Таяу Шығыстағы ең ірі әскери операция болды.
Трамп сондай-ақ Иранды хуситтердің алдағы шабуылы үшін жауапкершілікке тартамын деп қорқытып, оның салдары ауыр болатынын ескертті.
Израильдің ХАМАС-пен соғысы 2023 жылдың аяғында басталғаннан бері Иран қолдайтын хуситтер Газа секторындағы палестиналықтармен ынтымақтастықта әрекет етіп жатыр деп, теңіз кемелеріне 100-ден астам шабуыл жасады. Шабуылдар жаһандық сауданы бұзып, жүк тасымалдаушы компанияларды Африка құрлығында ұзағырақ жол жүруге мәжбүр етті.
Айта кетейік, биыл АҚШ-тың жаңа әкімшілігі йемендік хуситтерді «террорлық ұйым» деп тағы да мойындады.
Бұған дейін йемендік хуситтердің кім екенін айтқан болатынбыз.
