Ақтау маңындағы ұшақ апаты: Әзербайжан сыртқы істер министрі қазақ халқына алғыс айтты
АСТАНА. KAZINFORM — Бүгін елордаға Әзербайжан Республикасының Сыртқы істер министрі Джейхун Байрамов ресми сапармен келді.
Сапар аясында әзербайжандық министр Қазақстан Республикасы Премьер-министрінің орынбасары — Сыртқы істер министрі Мұрат Нұртілеумен шағын және кеңейтілген құрамда келіссөздер өткізді.
— Өткен жылы 25 қазанда Ақтау қаласы маңында болған ұшақ апатында қазақ халқына іздеу шараларына жедел көмек көрсеткені үшін ризашылығымды білдіремін. Екі ел арасында ұлтаралық, тарихи, діни және сенімді, әрі берік қарым-қатынас орнаған. Бұл біздің стратегиялық серіктестігіміздің негізі. Қазақстан Республикасы Президентінің Әзербайжанға үш сапары және Әзербайжан Президентінің Қазақстанға екі сапары бұл екіжақты жоғары қарым-қатынастың көрінісі, — деді Джейхун Байрамов БАҚ өкілдері алдында мәлімдеме жасай тұрып.
Мәртебелі мейманның мәлімдеуінше, достық қатынастан бөлек, екі ел арасындағы экономикалық және сауда саласы да қарқынды дамып келеді.
— Екіжақты 2025-2026 жылдарға арналған іс-қимыл картасы аясында күн тәртібіндегі барлық мәселені талқыладық. Сонымен қатар БҰҰ, ТүрікПА аясындағы байланысты нығайтуға басымдық берілді. Түрлі сала бойынша бастамаларға қолдау көрсетуге келістік. Қазақстан біздің мемлекеттің бастамасын қолдады. Өткен жылдың қорытындысы бойынша екіжақты сауда-саттық 500 млн долларға жетті, — дейді ол.
Еске сала кетейік, былтыр 25 желтоқсанда Ақтау маңында Azerbaijan Airlines ұшағы апатқа ұшырады. Бортта 67 адам, оның ішінде бес экипаж мүшесі болған. Апат салдарынан 38 жолаушы қаза тауып, 29 адам аман қалды.
Кейін Бразилия Әскери-әуе күштерінің Әуе апаттарын зерттеу орталығының (Cenipa) мамандары AZAL әуе компаниясының апатқа ұшыраған Embraer 190 ұшағының қара жәшігін талдауға кіріскенін хабарлаған болатын.
Биыл 4 ақпанда Ақтау маңындағы ұшақ апаты бойынша тергеудің есебі жарияланды.
