Ақтауда аялдамада салынып жатқан құрылыс заңсыз болып шықты
АҚТАУ. KAZINFORM – 15-шағын аудан 56 үйдің тұрғындары аулаларының алдындағы аялдамада бой көтерген құрылысқа қарсылық білдіріп, жарты жылдан бері әділдікке қол жеткізе алмай жүр.
Айтуларынша, құрылыстың салдарынан үйдің ауласына кіру қиындап, жүретін жер қалмаған. Сондықтан олар құзырлы органдарға шағымданып, құрылысты тоқтатуды талап еткен.
- Біріншіден, жер Тимур Сүлейманов деген жеке тұлғаға берілген. Екіншіден, бұл жердің астымен коммуникация желісі және газ құбыры өтіп жатыр. Оның үстіне 650 шаршы метр аумақты алып алған. Бұл заңсыз ғой, аялдамаға тек 70 шаршы метр бөлінеді, - дейді тұрғындардың бірі Роза Манасова.
Ақтау қалалық әкімдігінің мәліметінше, аталған аялдаманың аумағындағы жер учаскесі 2023 жылы жер комиссиясының шешімімен жеке кәсіпкерге берілген. Ал, Маңғыстау облыстық жер ресурстарын басқару департаментінің бөлім басшысы Нұрлан Шүйішмағанбетовтің айтуынша, кәсіпкерге аялдамаға қосымша жер беру кезінде Ақтау қалалық әкімдігі тарапынан заңсыздықтарға жол берілген.
- Осы 15-шағын ауданда орналасқан дүкен аялдама нысаны бойынша Ақтау қалалық прокуратурасынан ұсыным келді. Құжаттарын зерделеу барысында Ақтау қаласы әкімдігі тарапынан келесі заң бұзушылықтар анықталды. Аялдамаға қосымша жер беру кезінде жер кодексінің талаптары бұзылған. Яғни, қосымша берілген жер учаскесі ортақ пайдаланудағы кірме-шықпа жолдан беріліп кеткен. Сол «Таңшолпан» тұрғын үйінің кірме-шықпа жолынан берілген. Сонымен қатар, қосымша алған жердің астында орта қысымды газ құбыры өтіп жатыр, - дейді Нұрлан Шүйішмағанбетов.
Сондықтан департамент Ақтау қалалық жер қатынастары бөлімін жауапкер ретінде сотқа беріп, қосымша берілген 2 жер учаскесін мемлекет меншігіне кері қайтару және әкімдік пен кәсіпкер Сүлейменовтың арасына жасалған келісімшартты бұзу жөнінде талап арыз жолдаған.
Бұған дейін, Маңғыстауда 71 блогердің кірісін жасырғаны туралы жазған болатынбыз.
