Ақтауда дүкендегі сатушыны ұрған тұрғын сотталды

АҚТАУ. KAZINFORM – Оқиға 27-шағын ауданда орналасқан «Ақсу» дүкенінде болған. Ішімдікке сылқия тойып алған тұрғын сыра сатпағаны үшін саудагердің оң жақ бетінен жұдырықпен ұрған. 

Қылмыстық іс Ақтау қалалық сотында қаралып, күдікті кінәсін толық мойындаған және басқа да айғақтармен оның іс-әрекеті дәлелденген. 

Жалпы мұндай жағдайда ҚР Қылмыстық Кодекстің 293-бабы 1-бөлігінің санкциясында 500-ден 2 000 айлық есептiк көрсеткiшке дейiнгi мөлшерде айыппұл салуға, сол мөлшерде түзеу жұмыстарына немесе 300-ден 600 сағатқа дейінгі мерзімге қоғамдық жұмыстарға тартуға және 2 жылға дейінгі мерзімге бас бостандығынан шектеуге не сол мерзімге бас бостандығынан айыру түріндегі жаза көзделген.

– Сот жаза тағайындау барысында сотталушының қылмыстық жауаптылығы мен жазасын жеңілдететін және ауырлататын мән-жайлар анықталған жоқ. Сот үкімімен ол Қылмыстық Кодекстің 293-бабының 1-бөлігінде көзделген қылмыстық құқық бұзушылықты жасағаны үшін кінәлі деп танылып, оған 6 ай мерзімге бас бостандығынан айыру жазасы тағайындалды, - дейді Ақтау қалалық сотының баспасөз қызметі.

Бұған дейін, өгей қызын ұрып, шашынан сүйреген маңғыстаулық тұрғынға қатысты қылмыстық іс қозғалғаны туралы жазған болатынбыз