Ақтауда құбыр жарылып, тұрғындар ауыз сусыз қалды

АҚТАУ. KAZINFORM – Оқиға 8-шағын аудан 14-үйдің жанында болған. Магистралды ауыз су құбырынан ақау шығып, бірнеше үйге су беру тоқтатылды. 

Сондай-ақ 7, 9, 14 және 15-шағын аудандарда ауыз судың қысымы төмендетілген. Бұл туралы тұрғындар аймақ басшысының Telegram чатында жарыса жазып, шағымдануда.

- Ауыз сусыз қалдық. 23-наурыз күні кешке өшірді. Бүгін әлі су жоқ. Дүкеннен сатып алуға тура келіп тұр, - дейді тұрғындардың бірі. 

Ал, Каспий жылу, су арнасы мекемесінің басшылығы барлық күш кешеден бері құбырды жөндеуге жұмылдырылғанын, жақын арада қайта іске қосылатынын хабарлады. 

- 23 наурыз күні сағат 21.00 шамасында диспетчерлік қызметке 8-шағын аудан тұрғындарынан судың жоқтығы туралы шағымдар түсті. Тексеру барысында 8-шағын ауданның 14-үйінің жанында диаметрі 225 ауыз судың магистральдық құбырынан ақау анықталды. Апатты жою үшін барлық қажетті техника жұмылдырылды. Жөндеу жұмыстары шамамен сағат 18.00-ге дейін жалғасады, - дейді "Каспий жылу, су арнасы" МКК директорының орынбасары Ержан Жеңісұлы.

Бұған дейін, Ақтауда толассыз жаңбыр жауып, көшелерді су басып жатқаны туралы жазған болатынбыз.