Ақтауда жер асты қоқыс жәшіктеріне қатысты байқау тоқтатылды

АҚТАУ. KAZINFORM — Ақтау қалалық тұрғын үй-коммуналдық шаруашылығы бөлімі таратқан мәліметке сүйенсек, әкімдік қалаға жер асты қоқыс жинау жүйесін қою мәселесін қайта қарастырып жатыр.

— Жер асты қоқыс жәшіктерінің байқауы тоқтатылды. Басқа да нұсқалары қаралып жатыр. Алдағы уақытта мүмкін мүлде қоймайтын боламыз. Немесе санын азайтып қоямыз. Әзірге нақты шешім қабылданған жоқ. Бірақ байқау тоқтатылды, — делінген хабарламада. 

Бұған дейін, мемлекеттік сатып алу сайтында Ақтау қаласына жерасты қоқыс жәшіктерін сатып алуға арналған лот жарияланған болатын. Онда 192 контейнердің әрқайсысын 4 642 857 теңгеге сатып алу көзделген. Сатып алудың жалпы сомасы қосылған құн салығынсыз 891,4 миллион теңге тұрады.