Ақтаудағы ұшақ апаты: Ильхам Әлиев көңіл айтты

АСТАНА. KAZINFORM – Әзербайжан президенті Ильхам Әлиев Ақтаудағы ұшақ апаты салдарынан қаза тапқандардың туыстары мен жақындарына көңіл айтты, деп хабарлайды Kazinform.

Көңіл айту президент Ильхам Әлиевтің X әлеуметтік желідегі ресми парақшасында жарияланды.

Бұған дейін Шешенстан Республикасының басшысы Рамзан Кадыров Ақтау түбінде болған ұшақ апатынан қаза тапқандардың туыстарына көңіл айтты. 

Еске сала кетсек, Баку- Грозный J2-8243 нөмірлі рейсін орындаған Embraer 190 ұшағы Ақтау қаласынан 3 шақырым жерде апатты жағдайда қонды. 

Оқиға орнына ҚР Төтенше жағдайлар министрлігі жеке құрамының 52 адамы мен 11 бірлік техникасы барды.

Апатқа ұшыраған ұшақ бортында Қазақстанның 6 азаматы болды.

ҚР Көлік министрлігі мәлім еткендей, Әзербайжан тарапының алдын ала ақпараты бойынша, бортта 62 жолаушы мен 5 экипаж мүшесі болған.

ҚР Президентінің тапсырмасымен Мемлекеттік комиссия құрылды. 

Маңғыстау облысының денсаулық сақтау басқармасы Ақтауда Баку-Грозный рейсінде болған ұшақ апатынан зардап шеккендер туралы ақпаратты жаңартты.