Ақтөбеде екі адам суға батып кетті
АҚТӨБЕ. KAZINFORM – Сүңгуірлер екі адамның денесін Танаберген өзенінен алып шықты.
Оқиға Алға ауданы Маржанбұлақ ауылдық округінде болды. Екі адам суға түсуге тыйым салынған аумаққа батып кеткен.
– Маржанбұлақ ауылдық округінің өрт сөндіру бекетінің қызметкерлері, әкімдік өкілдері және төтенше жағдайлар бөлімі оқиға орнына барды. Сондай-ақ іздестіру-құтқару жұмыстарына сүңгуірлер тартылды. Жүргізілген іздестіру шараларының нәтижесінде екі адамның денесі судан шығарылды. Адамдардың денесі өзен жағасынан шамамен 7 метр қашықтықта тереңдігі 3 метр жерден табылды, - деп хабарлады облыстық ТЖД баспасөз қызметі.
Тамыз айында Ақтөбе қаласында 3 және 5 жастағы балалар суға батып кетті. Қайлығы оқиға Ясное-2 тұрғын алабы аумағында болды. Екі баланың денесін құтқарушылар 3 метр тереңдіктен алып шықты.
