Ақтөбеде ерлікпен қаза тапқан полиция қызметкерінің кабинетінде қауіпсіздік сабағы өтті
АҚТӨБЕ. KAZINFORM – Ақтөбеде қызметтік міндеттін атқару кезінде ерлікпен қаза болған полиция аға лейтенанты Руслан Жолдыбаев оқыған мектепте қауіпсіздік ережелері түсіндірілді. Әрі суға батып бара жатқан баланы құтқарған оқушыға құрмет көрсетті.
Бүгін Ақтөбе облысында барлық мектепте алғашқы қоңырау салтанатты түрде өтті. Оған 1 және 11 сынып оқушыдары ғана қатысты. Барлығы 18 020 бала бірінші сыныпқа қабылданды.
Білім күні Ақтөбенің барлық мектебінде қауіпсіздік ережесі түсіндірілді. Ақтөбе облысы Полиция департаментінің бастығы Абай Жүсіпов Ақтөбе қаласындағы №13 орта мектептің алғашқы қоңырау салтанатына барып, балаларды Білім күнімен құттықтады.
Бұл мектеп – қызметтік міндетін атқару кезінде ерлікпен қаза болған полиция аға лейтенанты Руслан Жолдыбаев оқыған білім ордасы. Жуырда осы мектеп қабырғасында батыр-полицейдің атындағы арнайы кабинет мен полицей сыныбын ашылған.
– Бүгін балалар мен ата-аналардың жүрек толқынысы мен қуанышы ерекше сезіледі. Себебі алғашқы қоңырау әрбір балақайдың жаңа әлемге қадам басуын, үлкен, жарқын өмір есігін ашуын білдіреді. Әрбір балақайға – құтты қадам, шуақты ғұмыр, найзадай намыс пен жасымас жігер тілейміз. Олардың қауіпсіздігі мен жарқын болашағы үшін біз әрдайым күзеттеміз, - Абай Жүсіпов.
Батыр-полицей Руслан Жолдыбаев оқыған мектептің тәрбиеленушілері ержүрек ағаларының ізімен ерлік жасап жүргенін атап көрсетіп, былтыр жаз мезгілінде Елек өзеніне батып бара жатқан замандасын құтқарған 11 сынып оқушысы Қолқанат Баққұлды, оның ата-анасы мен ұстаздарын марапаттады.
Кейін осы мектептегі Руслан Жолдыбаев кабинетінде жас сақшыларымен бірге 1 сынып оқушыларына суретті боямалы кітапшалар арқылы жол жүру ережелерін түсіндіріп, қауіпсіздік талаптарын айтып берді.
Еске салсақ, Қолқанат Баққұл былтыр замандасын құтқарып қалды. Ол судан шығарған бойда балаға алғашқы медициналық көмек те көрсеткен.
