Ақтөбеде ҚазКСР Жоғарғы сотының төрағасы Әбидолла Биекеновтің 100 жылдығы атап өтілуде

АҚТӨБЕ. 17 қыркүйек. ҚазАқпарат /Самал Ендібаева/ - Бүгін Ақтөбеде көрнекті мемлекет және қоғам қайраткері, заңгер, ҚазКСР Жоғарғы сотының төрағасы Әбидолла Биекеновтің туғанына 100 жыл толуына арналған шаралар өтуде.

Таңертең облыстық сот ғимаратында митингі өтті және оған қатысушылар Әбидолла Биекеновтің мүсініне гүл шоқтарын қойды, бұдан кейін ғылыми-практикалық конференция болды. Шараға мемлекеттік және құқық қорғау органдарының, оқу орындарының өкілдері, белгілі заңгерлер, сондай-ақ Әбидолла Биекеновтің туыстары қатысты. Конференция кезінде «Жасын ғұмыр» кітабының таныстырылымы болды.

Әбидолла Биекенов 1911 жылы Ақтөбе облысының Шалқар ауданында №19 ауылда туған. 1929 жылы теміржол мектебін, Ақтөбе кеңес-партия мектебін, 1939 жылы КСРО Әділет Халық комиссариаты жанындағы Құқық академиясын үздік бітірді. Ұлы Отан соғысына қатысушы. Екі Қызыл жұлдыз орденімен марапатталған.

1931-32 жылдары Шалқар аудандық кәсіподағында хатшы, Шалқар аудандық «Социализм туы» газеті редакторының орынбасары, Қарабұтақ аудандық партия комитетінің хатшысы, Қарабұтақ аудандық тұтыну одағы кооперациясы бастығының орынбасары болды. 1936-1939 жылдары Шалқар, Жем аудандарының судьясы, Ақтөбе облыстық сотының судьясы, 1942-1945 жылдары Ұлы Отан соғысында Беларус майданы І саяси басқармасының нұсқаушысы болды. 1946 жылы ҚазКСР Жоғарғы сотының төрағасы қызметіне сайланды.