Ақтөбеде оқушы қызға сексуалдық зорлық көрсетті деген күдікпен ер адам ұсталды
АҚТӨБЕ. KAZINFORM – Оқиға Хромтау қаласында болған. Қазіргі кезде 14 жастағы оқушы қызға азғындық жасады деген күдікпен 25 жастағы жігіт қамалды.
Ақтөбе облыстық ПД баспасөз қызметінің хабарлауынша, қылмыстық іс қозғалды. Күдікті дереу ұсталып, уақытша ұстау изоляторына қамалды.
– Қазіргі уақытта қажетті тергеу және процестік іс-әрекеттер кешені жүргізіліп жатыр. Қылмыстық процесс қатысушыларының барлық дәлелі тексеріліп, айғақтар жиналып және талданады. Тергеу органдары істің барлық мән-жайын мұқият анықтап, зерделеп жатыр. Толық әрі жан-жақты тергеу қорытындысы бойынша заңды және негізделген процестік шешім қабылданады. Тергеу мүддесіне сәйкес, сондай-ақ кәмелетке толмағанның құқықтары мен заңды мүдделерін қорғау мақсатында өзге ақпарат жария етуге жатпайды, - деп хабарлады Ақтөбе облыстық ПД баспасөз қызметі.
Бұған дейін хабарлағанымыздай, Ақтөбе облысы Темір ауданында мектеп оқушысы жүкті болып, қылмыстық іс қозғалды. Жасөспірім қыз бірнеше рет түнгі рейд кезінде ұсталған.
