Ақтөбеде оқушылардың көлік апатына ұшырауына байланысты тергеу жүргізілуде
АСТАНА. ҚазАқпарат - Волейболдан жарысқа кетіп бара жатқан оқушылар мінген көліктің апатқа ұшырауына байланысты тергеу жүргізілуде, деп хабарлайды Ақтөбе облысы әкімі аппараты басшысының орынбасары – облыс әкімінің баспасөз хатшысы Ержан Байтанаев Фейсбуктегі парақшасында.
«Достар, бүгін Ақтөбе облысында орын алған қайғылы жағдайды түсіндіргім келеді. Ең алдымен, қайтыс болған баланың ата-анасы мен жақындарына көңіл айтамын. Жол апатында тағы 8 бала зардап шекті. Оларға барлық қажетті медициналық көмек көрсетіледі. Қазіргі уақытта осы оқиға бойынша тергеу жүргізілуде. Іс - облыс әкімі Ералы Тоғжановтың қатаң бақылауында. Психологтар зардап шеккендер және олардың туыстарымен міндетті түрде жұмыс істейді. Оларға жан-жақты көмек көрсетіледі» делінген хабарламада.
Айта кетейік, бұған дейін Ақтөбе облысында жаттықтырушы мен балалар болған көлік жол апатына ұшырағанын жазған едік.
