Ақынның сыйлығынан сөзі қымбат: Павлодарда айтыс өтті

ПАВЛОДАР. ҚазАқпарат – Павлодарда Естай атындағы мәдениет сарайында Мұзафар Әлімбаевтың 100 жылдығына орай, «Ақынның сыйлығынан сөзі қымбат» атты айтыс ұйымдастырылды, деп хабарлайды ҚазАқпарат Pavlodarnews.kz сайтына сілтеме жасап.

Дүбірлі додаға 10-нан астам айтыскер қатысты. Жүйрік ақындардың қатарында жаңадан айтысып жүрген жас айтыскерлер де болды. Бексұлтан Қайдар, Гүлшекер Батай, Оразбек Саяхат, Нұрқанат Қайрат, Бөкен Жігер, Ерлан Аманқожа, Нұрбек Бәкір, Қайролла Хафиз, Қазбек Ибархим, Алпысбай Хонж, Нұрсұлтан Рымбай және Мизан Жұмалі сынды өңір айтыскерлері өнер көрсетті.

Сонымен, айтыс нәтижесі бойынша, бас жүлдені және 500 мың теңгелік сертификатты Нұрбек Бәкір ұтып алса, бірінші орынды Қайролла Хафиз иеленіп, 400 мың теңге алды. Екінші орынды және 250 мың теңгелік сыйақыны Нұрқанат Қайрат пен Бөкен Жігер иеленді.

Үшінші орынға Оразбек Саяхат пен Нұрсұлтан Рымбай табан тіреп, 150 мың теңгелік сертификаттың иелері атанды.

Зекебай Солтанбайұлы атындағы арнайы жүлде Алпысбай Хонжға, Арман Қани атындағы арнайы жүлде Ерлан Аманқожаға бұйырды. Арнайы жүлде алғандарға 100 мың теңгелік сыйақы табысталды. Сонымен қатар, әр қатысқан ақынға 80 мың теңгелік ынталандыру жүлдесі берілді.

Айта кету керек, айтысқа қатысқан ең жас ақын – Ибрахим Қазбек. Ақынның жасы 16-да. Бұған дейін де бірнеше айтысқа қатысып, халықтың ықыласына ие болып жүр.