«Ақжайықтың асыл арулары» атты жаңа кітап жарық көрді

ОРАЛ. 7 наурыз. ҚазАқпарат - Алматыдағы «Мереке баспалар үйінен» «Ақжайықтың асыл арулары» атты жаңа кітап жарық көрді.

Халықаралық әйелдер күні қарсаңында басылып шыққан кітапқа Батыс Қазақстаннан түлеп ұшқан Алматыдағы «КАТЭК» ЖШС президенті Құндыз Нұпов демеуші болса, Қадыр Мырза Әлі атындағы қоғамдық қор (төрағасы Донеділ Қажымов) жауапты редакторлық етті.

Қыз Жібектей арудан бас­тау алған анықтамалық Әбіл­қайыр ханның зайыбы, шебер дип­ломат Бопай, Бөкей ханның екінші әйелі Отан ханыммен жалғасады. Жиырмасыншы ғасыр басында өмір сүрген қазақтың белгілі қоғам қайрат­керлері Мәдина Бегалиева мен Алма Оразбаева туралы мәліметтер де бар.

Күй анасы Дина Нұрпейісованың қазақ өнеріндегі орны тіптен ай­рық­ша. Дәулескер күйші ғажап күй­лерімен, орындаушылық қабіле­ті­мен талайды тамсандырды. Жасы ұлғайған шағында 1939 жылы Мәс­кеуде өткен халық аспаптары орындаушыларының бүкілодақтық байқауына қатысты.

Ұлы Отан соғысында өшпес ерлік өнегесін көрсеткен Кеңес Одағының Батыры Мәншүк Мәметова мен Ха­лық Қаһарманы Хиуаз Доспановаға осы кітаптан орын тиген. Атақты «Жетім қыз» дастанының авторы Алмажан Азаматқызы, ақын Ақұштап Бақтыгереева, КСРО халық әртісі Хадиша Бөкеева, КСРО халық әр­тісі, опера әншісі Роза Жаманова, қазақ киносының «Қыз Жібегі» Меруерт Өтекешовалар - ұлттық өнерді әлемдік деңгейге көтерген тума таланттар.

Кітапта осы және басқа да аяу­лы жандар туралы мол мағлұмат бе­рілген.