Алаяқтар БҚО әкімінің атынан жалған хабар таратқан

ОРАЛ. KAZINFORM - WhatsApp қосымшасында Батыс Қазақстан облысының әкімі Нариман Төреғалиевтің атынан жалған хабарлама таралуда. Алаяқтар өңір басшысына тиесілі емес нөмірді көрсеткен.

БҚО әкімінің баспасөз қызметінен мәлім еткеніндей, қазіргі кезде белгісіз біреулер WhatsApp мессенджерінде облыс әкімінің атынан тұрғындарға хабарлама таратуда.

«Аталған хабарламалардың жалған екендігін мәлімдейміз. Облыс әкіміне тиесілі ондай нөмір жоқ. Аталған хабарламаларға сенбеу және күдікті сілтемелерге өтпеу керектігін еске саламыз», деп хабарлады ведомстводан.