Алаяқтық жасады деп айыпталған 620 Қытай азаматы еліне қайтарылды

АСТАНА. KAZINFORM - Қытай, Мьянма және Таиланд елдерінің құқық қорғау органдары трансшекаралық телекоммуникациялық алаяқтыққа қарсы бірлескен операцияларді күшейтіп жатыр.

Нәтижесінде жыл басынан бері трансшекаралық қылмыстық топтың мүшесі деген күдікпен ұсталған 620 Қытай азаматы еліне қайтарылды. Бұл туралы Lianhe Zaobao басылымы хабарлады.

28 ақпан күні Таиландтың Бангкок қаласында үш елдің өкілдері трансшекаралық телекоммуникациялық алаяқтыққа қарсы күресті үйлестіру жөнінде министрлік деңгейінде кездесу өткізді. Кездесуде тараптар бірлескен күресті одан сайын күшейту жайлы пікір алмасып, бірқатар уағдаластыққа қол жеткізді.

Басылымның жазуынша, кездесу трансшекаралық алаяқтыққа қарсы күрес бойынша Қытай, Мьянма және Таиланд арасындағы ынтымақтастықтың маңызды әрі кезеңдік нәтижеге қол жеткізгенін көрсетті. Кездесуде тараптар бірлескен іс-қимылды ұдайы жалғастыру, тұрақты үйлестіру тетіктерін орнату, ақпарат алмасуды күшейту, күдіктілерді еліне қайтару рәсімдерін жетілдіру мәселесі бойынша келісімге келді.

Белгілі болғандай, соңғы уақытта үш елдің тиісті ведомствалары ұйымдастырған бірлескен операциялардың нәтижесінде, Мьянманың Мьявади аймағында қолға түскен 620 Қытай азаматы еліне қайтарылған.

Соңғы жылдары Мьянманың шекаралық аудандарында телекоммуникациялық алаяқтық өршіп тұр. Алаяқтықпен айналысатын қылмыстық топтар шетел азаматтарын «жалақысы жоғары жұмыс бар» деп шырғалап, аймаққа шақырып алғаннан кейін кепілге алып, интернет арқылы алаяқтық жасауға мәжбүрлейді.

Қытай тарапынан жасалған қысымның күшеюіне байланысты, жыл басынан бері Мьянма билігі алаяқтардың бірқатар «апанын» жойды. Арнайы операциялар барысында 20-ға жуық елдің шамамен 7000 азаматы құлдықтан босатылды.

Осыған дейін Қазақстанға интернет-алаяқтық жасау үшін келген шетелдіктің тұтқындалғаны туралы жаздық.