Алдағы күндері кей өңірде 35 градус ыстық болады
АСТАНА. KAZINFORM – Алдағы күндері Қазақстан аумағындағы ауа райына екі барикалық құрылым әсер етеді.
Елдің батыс және оңтүстік өңірлері оңтүстік циклонның ықпалында болады. Бұл аймақтарда өткінші жаңбыр жауып, найзағай күтіледі, сондай-ақ күндізгі ауа температурасы +27…+35 градусқа дейін жоғарылайды.
Республиканың қалған бөлігінде суық антициклон өз әсерін сақтайды. Түнгі уақытта солтүстік, шығыс және орталық өңірлерде 1–6 градусқа дейін үсік күтіледі. Ал күндіз аспан ашық болып, ауа температурасы +12…+28 градустан +20…+30 градусқа дейін көтеріледі.
Республика бойынша жел күшейеді, ал оңтүстік өңірлерде шаңды дауыл болуы мүмкін. Түнгі және таңертеңгі уақытта солтүстік, шығыс өңірлерде және оңтүстік-шығыстың таулы аудандарында тұман күтіледі.
Айта кетелік бүгін Алматыда және тағы бес қалада ауа сапасы төмендейді.
