Алдағы оқу жылында Павлодар мектептерінде 116 мыңнан аса оқушы білім алады

ПАВЛОДАР. KAZINFORM — 1 қыркүйектен бастап 360 мектепте 116 мыңнан астам оқушы білім алатын болады. Оның ішінде 10 552 бала алғаш рет мектеп табылдырығын аттайды.

Бұл туралы Павлодар облысы әкімінің баспасөз қызметінен хабарлады.

— 2025-2026 оқу жылында өңірде 840 білім беру ұйымы жұмыс істейтін болады және барлық бала үшін сапалы қызметтерге тең дәрежеде қолжетімділікті қамтамасыз етуге назар аударылады. Биыл 2 жастан 6 жасқа дейінгі балаларды қамту көрсеткішін ұлғайтуға мүмкіндік беретін 220 орындық төрт жаңа балабақша ашылады. Бұл ретте ауқымды қаржыландыру реформасы жалғасуда: «ақша баланың соңынан жүреді» ваучерлік қағидаты енгізіліп жатыр. Бүгінгі таңда бұл тетікпен Павлодардың мектепке дейінгі 83 ұйымы қамтылып, 7545 ваучер берілді, — деп мәлімдеді әкімдіктен.

Жайлы білім беру ортасын құруға көңіл бөлініп отыр. 32 мектепте жөндеу жұмыстары жүргізілуде және бүгінде оның басым бөлігі аяқталған. Сонымен қатар, 21 мектепте 427,2 млн теңгеге жаңа оқу кабинеттері пайда болды.

Осылайша жаңа оқу жылында жалпы саны 116 мыңнан астам оқушының қолайлы жағдайда білім алуы қамтамасыз етіледі.

Бұған дейін Ертіс бойында мектептерде орын тапшылығы қалай шешіліп жатқаны туралы жазғанбыз.