Александр Бублик Дубай ATP 500 турнирінің екінші айналымына өтті

АСТАНА. KAZINFORM — Қазақстанның бірінші, әлемнің 23-ракеткасы Александр Бублик Дубай ATP 500 турнирін сәтті бастады.

Жарыстың 7-ракеткасы болып тіркелген қазақстандық спортшы бастапқы кездесуін дүниежүзілік рейтингіде 65-орында тұрған, доданы іріктеу сайысынан бастаған чехиялық Томаш Махачпен өткізді.

Чехия өкілі матчты қарқынды бастады — 6:2.

Есесіне екінші сетте Бублик есе қайырды — 6:3.

Үшінші, шешуші партияда есеп 6:5 болып, матчқа доп бергенде, А.Бублик сол мүмкіндігін мүлт жіберді. Дегенмен тай-брейкте жеңісті жұлып алды — 7:6 (7:5).

Екі сағатқа жуық уақытқа созылған тартысты бәсеке барысында Бублик 7 эйспен бірге 6 брейк-пойнттың тең жартысын пайдаланды. Қарсыласы 3 эйс, 4 брейкпен (8 брейк-пойнт) көзге түсті.

Александр Бублик жүлде қоры 2,9 млн АҚШ долларына бағаланған турнирдің ширек финалына шығу үшін әлемнің 28-ракеткасы, нидерландтық Таллон Грикспор немесе рейтингіде 228-сатыдағы иорданиялық Абедалла Шелбайхтың біреуімен таласады.

Тағы бір қазақстандық, рейтингіде 47-сатыдағы Александр Шевченко ертең алғашқы айналымда әлемнің төртінші, жарыстың 1-ракеткасы, ресейлік Даниил Медведевпен ойнайды. 

Өткен жылы А.Бублик Дубайда екінші айналымда дәл осы Д. Медведевке есе жіберген еді.

Еске сала кетейік, бұдан бұрын Әмір Омархановтың жасөспірімдер арасында әлемдік рейтингіде 12-орынға көтерілгенін жазған болатынбыз.

Сондай-ақ Михаил Кукушкин Испанияда негізгі турнирге жолдама алды.