Александр Кержаков «Қайрат» клубына бас бапкер болып тағайындалды

АСТАНА. KAZINFORM — «Қайрат» футбол клубының бас бапкері қызметіне ресейлік маман Александр Кержаков тағайындалды.

Бұл жөнінде команданың баспасөз қызметі мәлім етті.

Александр Кержаков Ресей футболының (233 гол), санкт-петерборлық «Зениттің» (161 гол), Ресей құрамасының (30 гол) тарихындағы үздік сұрмергені атанған.

Ойыншы ретінде «Зениттен» бөлек испаниялық «Севилья», швейцариялық «Цюрих» пен Ресейдің «Динамо» (Мәскеу) командаларында ойнаған.

УЕФА, Испания кубогы мен суперкубогының, Швейцария Кубогының иегері.  

Александр бапкерлік мансабын 2017 жылы «Зенит» футбол кулбы академиясында бастады.

2018-2020 жылдар аралығында Ресейдің 17, 18, 19 жасқа дейінгі жасөспірімдер құрамаларын жаттықтырған. 

Сондай-ақ, ол ресейлік «Томь» және «Нижний Новгород», кипрлік «Кармиотисса» мен сербиялық «Спартак» Суботица футбол клубтарын баптаған.

Айта кетсек, бұдан бұрын алматылық клубта Кирилл Кекер бас бапкер қызметін атқарған еді. Команданың төмен нәтижесіне байланысты ол орнынан кетті.

Еске салсақ, бүгін Қазақстан кубогының жартылай финалы басталады.