Александр Недовесов Мексикадағы турнирдің ширек финалына жолдама алды

АСТАНА. KAZINFORM – Қазақстанның жұптық сындағы бірінші ракеткасы Александр Недовесов Лос-Кабос (Мексика) ATP 250 турнирінің ширек финалына жолдама алды.

Қазақстандық теннисші эквадорлық Гонсало Эскобармен бірге бастапқы кездесуін тағы бір эквадорлық Диего Идальго – колумбиялық Кристиан Родригеспен өткізді.

А.Недовесов – Г.Эскобар 6:2, 6:4 есебімен басым түсті. Сағат жарымға жуық уақытқа созылған бәсеке барысында олар 8 эйспен бірге 12 брейк-пойнттың төртеуін пайдаланды. Д.Идальго – К.Родригес 1 эйс, 1 брейктен (3 брейк-пойнт) аса алмады.

Қазақстандық-эквадорлық жұптың ширек финалдағы қарсыластары кейін анықталады.

А.Недовесов ATP Live рейтингісінде қазіргі кезде 49-орында тұр.

Еске сала кетейік, бұдан бұрын Елена Рыбакинаның екі айда бес рет WTA турнирінің ширек финалына шыққанын жазған едік.