Александр Шевченко Франциядағы жарыстың ширек финалына шықты

АСТАНА. KAZINFORM - Қазақстанның екінші, әлемнің 97-ракеткасы Александр Шевченко Бордо (Франция) челленджер турнирінің ширек финалына жолдама алды.

Қазақстандық теннисші екінші айналымда дүниежүзілік рейтингіде 176-орында тұрған франциялық Кальвин Эмеридің мысын басты.

Матч 6:3, 6:4 есебімен аяқталды.

Бір сағат 18 минутқа созылған бәсеке барысында Шевченко 6 эйспен бірге 5 брейк-пойнттың екеуін пайдаланды. Эмери 5 эйспен шектелді.

Александр Шевченконың келесі қарсыласы кейін анықталады.

Тағы бір қазақстандық, рейтингіде 165-орындағы Михаил Кукушкин әлемнің 29-ракеткасы, америкалық Брендон Накасимаға жол берді - 3:6, 5:7.

Еске сала кетейік, бұдан бұрын Михаил Кукушкиннің Франциядағы турнирде ресейлік теннисшіден басым түскенін жазған болатынбыз.