Әлем чемпионы Нұрқожа Қайпановқа жаңа көліктің кілті табыс етілді

АЛМАТЫ. KAZINFORM – Жуырда Албания астанасы Тиранада еркін күрестен өткен әлем чемпионатында жеңімпаз атанған Нұрқожа Қайпановқа жаңа көліктің кілті табыс етілді.

Қазақстан күрес федерациясынан мәлім еткеніндей, кәсіпкер, күрес жанашыры Ерлан Қожасбай әлем чемпионатында 70 келіге дейінгі салмақта үздік шыққан Нұрқожа Қайпановқа жаңа көлікті сыйға тартты. 

Өз кезегінде әлем чемпионы да алғысын айтты. 

«Қазақ балуандарын әрдайым қолдап келесіз. Бізді құрметтеп, қолдағаныңыз үшін көп-көп рахмет. Алла разы болсын!», - деді Н.Қайпанов.

Еске сала кетейік, бұдан бұрын Нұрқожа Қайпановтың еркін күрестен әлем чемпионы атанғанын жазған болатынбыз.

Сондай-ақ әлем чемпионы Нұрқожа Қайпанов алдағы мақсаты – Олимп шыңын бағындыру екені туралы айтты.