Әлем кубогы: Спорттық гимнастикадан қазақстандық тағы бір спортшы күміс алды

АСТАНА. KAZINFORM - Әзербайжан астанасы Баку қаласында өтіп жатқан спорттық гимнастикадан әлем кубогында ел құрамасы қоржынына тағы бір күміс жүлде түсті.

Бұл жолы Дмитрий Патанин екінші орын алды. Гимнастшы қоссырықтағы жарыста төрешілердің шешімі бойынша 13,400 ұпай жинады. Осылайша екінші орынға табан тіреді.

Аталған сайыста жапондық Казуки Мацуми (14,200 ұпай) чемпион атанса, үздік үштікті хорватиялық Петар Вефич (13,033 ұпай) түйіндеді.

Еске салсақ, бұдан бұрын әлем кубогында қазақстандық Милад Карими күміс медаль алды.

Еркін жаттығу сайысында ол 14,300 ұпай жинады. Бұл екінші орын алуға мүмкіндік берді. 

Сайыс барысында беларусьтік Егор Шарамков (14,600) жеңіс тұғырына көтерілді. Ал үздік үштікті украиналық Назар Чепурный (13,633) түйіндеді.