Әлем тыныш емес кезде ел тәуелсіздігін ерекше бағалауымыз керек – Сабырхан Смағұлов

1991 жылы азаттық таңы атқанын өз көзімен көрген алдыңғы буын болмаса, кейінгі жастар өткен ғасырдың, әсіресе 90-жылдардағы тарихи оқиғалардың тереңіне бойлап, мәнін жете түсіне бермейді. Әл-Фараби атындағы Қазақ ұлттық университеті «Қазақстан тарихы» кафедрасының аға оқытушысы Сабырхан Смағұлов осындай ой айтты, деп хабарлайды Kazinform.

Тарихшының айтуынша, қазіргі жастар тәуелсіздікке тағдырдың бере салған сыйы ретінде қарайды.

«Ал шын мәнінде ахуал оңай емес. Қазақ халқының тарихына қарасақ, түрлі зұлматтар мен нәубеттерді, ауыртпалықтарды басынан кешірген. Соған қарамай, қазақ халқы ұлт-азаттық жолындағы күресті бір күн де тоқтатқан жоқ. Сол жолда күндіз отырмады, түнде ұйықтамады. Тағдыршешті мәселелерде жеті рет емес, жетпіс рет өлшеп, кесуге мәжбүр болды. Біз тығырықтан ұрынбай аман-есен шығып, ешкімге есемізді жібермей, жаңа сипаттағы қазақ мемлекетін құрдық. Бүгінгі және болашақ ұрпақ мұны әрдайым біліп отыруы керек», — дейді тарихшы.

Ғалым бүгінгі күні әлемде тыныштық болмай тұрғанын, сол себепті әртүрлі жағдайға дайын болып, ел тәуелсіздігін ары қарай нығайта беру керек деп санайды.

«Тәуелсіздікке бастайтын жол ашып берген маңызды саяси құжат 1990 жылы 25 қазанда қабылданып жарияланған Қазақстанның мемлекеттік егемендігі туралы декларация еді. Ол конституциялық маңызы бар, тарихи оқиға болды. Тәуелсіздік — шын мәнінде ең басты құндылығымыз. Қол жеткен тәуелсіздіктен, алған азаттықтан айрылып қалмалық деп орасан зор қайрат көрсетуіміз керек, оны көзіміздің қарашығындай қорғап, сақтауымыз және ары қарай нығайтуымыз керек. Бәрімізге мәлім, бүгінгі күні дүние отқа оранып тұр. Сондықтан қай кезде болмасын, қаруымыз қайраулы, атымыз байлаулы болуы керек. Ұйымдасып, бір жағадан бас, бір ауыздан сөз, бір жеңнен қол шығарып, еліміздің одан әрі күшеюіне қызмет қылуымыз әрі тәуелсіздігімізді ерекше бағалай білуіміз қажет», — деді Сабырхан Смағұлов.

Тәуелсіздіктің арқасында Қазақстан өзге елдермен терезесі тең, керегесі кең елге айналды.

«Біз сан жылдар бойы, ата-бабаларымыз аңсаған, сол жолда қанын төгіп, жанын құрбан еткен бостандыққа қол жеткіздік. Жаңа заман келіп, жарық күн туып, нұрын шашты, темір құрсаудан шықтық. Күрмелген тіл, байланған жол ашылды. Ауыздағы қақпақтан, аяқтағы тұсаудан арылдық. Армансыз еркін сөйлеп, ой-пікірімізді ашық айтуға қол жеткіздік. Ел еркі өзіне тиді, ел тізгінін өз қолымызға алдық. Ұлы дала төсінде көк байрағы желбіреген, төрткүл дүние түгел мойындаған, БҰҰ-дағы барлық мемлекеттермен терезесі тең, керегесі кең қазақ мемлекеті салтанат құрды. Бұл — барша қазақстандықтар үшін көңіл толқытар, жүрекжарды ұлы оқиға әрі баға жетпес құндылық», — деп атап өтті спикер.

Қазақстанның тәуелсіздік алғанына биыл 32 жыл толды. Адамзат тарихы үшін бұл уақыт аз болғанымен, спикер «еліміз үшін 30 ғасырға татитын уақыт» деп бағалайды.

«1991 жыл — Қазақстанның тарихы мен тағдырындағы ең елеулі, аса маңызды жыл. Тәуелсіздік дәуірінің жыл санауы басталды. Себебі, Қазақстан Республикасының мемлекеттік тәуелсіздігі туралы Конституциялық заң қабылданды. 1991 жыл қазаққа өшкені жанып, өлгені тірілгендей қуанышты жыл болды. Биыл Қазақстан Республикасының тәуелсіздігіне 32 жыл толып отыр. Адамзат тарихы үшін 32 жыл аз уақыт көрінгенмен, біздің халқымыз үшін осы бір тағдырлы уақыт межесі 30 ғасырға татиды деп айтуға болады», — деді Сабырхан Смағұлов.