Әлемдік БАҚ-тағы Қазақстан: Каспий түбіне кабель тарту, ЕО-мен байланыс және металлургия саласы
Наурыздың орта тұсында алыс-жақын елдердегі бұқаралық ақпарат құралдары Қазақстан жөнінде аз жазбады. Соның ішінде Каспий теңізінің түбіне электр кабелін тарту, Еуропалық Одақпен жаңа келісім, металлургия саласының дамуы мен Бурабай курортын дамыту мәселелері көзге түсті. Толығырақ Kazinform тілшісінің шолуынан оқыңыз.
Trend: Екі ел Каспийдің түбіне терең су электр кабелін тартуды талқылады
Қазақстан мен Әзербайжан Каспий теңізінің түбіне талшықты-оптикалық байланыс желісі мен терең сулы электр кабелін тартуды қоса алғанда, ірі стратегиялық жобаларды іске асыру мәселелерін сөз етті. Бұны Trend жазды.
Мәселе Қазақстан Президенті Қасым-Жомарт Тоқаевтың Астанада ресми сапармен жүрген Әзербайжан сыртқы істер министрі Джейхун Байрамовпен кездесуінің күн тәртібінің бір бөлігі болды. Президент Тоқаев бұл кездесудің көпқырлы мемлекетаралық байланыстарды одан әрі нығайту үшін маңыздылығын атап өткен.
«Сіздің сапарыңыздың бауырлас Әзербайжан елімен ынтымақтастығымызды одан әрі ілгерілету тұрғысынан мәні зор. Біз үшін Әзербайжанмен қарым-қатынас ерекше маңызға ие. Біз Сіздің еліңізді сенімді стратегиялық серіктес және одақтас ретінде қарастырамыз», – деп баса айтты ол.
Әзербайжанның СІМ басшысы дәстүрлі жылы қабылдауы үшін алғысын білдіріп, екіжақты қарым-қатынастардың қарқынды дамып келе жатқанын атап өтті.
Джейхун Байрамов қазақстандық тарапқа Ақтауда «Әзербайжан әуе жолдары» ұшағының апатқа ұшырауына байланысты жедел көмек көрсеткені үшін алғыс білдірді. Сондай-ақ сауда, инвестиция, цифрландыру, транзит және көлік салаларындағы одан арғы өзара іс-қимыл перспективалары қаралды.
Anadolu: Қазақстан мен Еуропа Одағы аса маңызды шикізат бойынша келісімге қол қойды
Қазақстанның СІМ басшысы Мұрат Нұртілеу еуропалық комиссар Йозеф Сикеламен келіссөздер жүргізді. Нәтижесінде, Қазақстан мен Еуропа Одағы 3 млн еуроға аса маңызды шикізат материалдары саласында келісімге қол қойды. Ақпаратты түркиялық басылым Anadolu жариялады.
ҚР СІМ хабарлағандай, Премьер-Министрдің орынбасары, Сыртқы істер министрі Мұрат Нұртілеу еуропалық комиссар Йозеф Сикеламен келіссөздер жүргізген. Жүздесу барысында көлік және логистика, сындарлы шикізат материалдары сияқты екіжақты және өңірлік ынтымақтастықтың басым бағыттарындағы нақты жобаларды іске асыру мәселелері талқыланған. Жасыл энергетика, цифрландыру, климаттың өзгеруі, ғарыш тақырыбы да әңгіме етілген.
Тараптар өзара іс-қимылдың 29 саласын қамтитын Кеңейтілген әріптестік пен ынтымақтастық туралы келісім жасасқан. Оның шеңберінде Қазақстан мен Еуропалық одақ арасындағы көпқырлы ынтымақтастықты одан әрі дамытуға, сондай-ақ ЕО-ның Орталық Азия бойынша стратегиясын іске асыруға бейілділігі атап өтілген.
Келіссөздер ҚР СІМ басшысының төрағалығымен Қазақстанның түрлі мемлекеттік органдары мен ведомстволары басшылығының қатысуымен «дөңгелек үстел» форматында Еуроодақтың «Global Gateway» бастамасы аясында жалпы бюджеті 300 млрд еуро болатын тұрақты даму және өзара байланыс талаптарына жауап беретін инфрақұрылымдық жобаларды ілгерілетуге бағытталған өзара тиімді жобаларды талқылау үшін өтті.
Келіссөздер барысында Қазақстан, Орталық Азия және ЕО арасындағы өзара байланысты нығайтуға, атап айтқанда, Транскаспий халықаралық көлік бағдарын одан әрі дамытуға бағытталған көлік дәліздерін жаңғырту мәселелеріне ерекше назар аударылды.
«Келіссөздердің маңызды қорытындыларының бірі екі құжатқа қол қою болды – Еуропалық инвестициялық банктің Қазақстанның Даму банкіне 200 млн еуро сомасына қарызы үшін кепілдіктер туралы келісім және Еуропалық одақ пен Еуропалық қайта құру және даму банкі арасындағы Қазақстан мен Орталық Азиядағы аса маңызды шикізат материалдары саласындағы жобаларды дамыту жөніндегі 3 млн еуро сомасына келісім», – делінген хабарламада.
Тараптар орнықты және инклюзивті экономикалық өсімді нығайтуға, инновациялық дамуға және жаһандық сын-қатерлерді бірлесіп шешуге ықпал ететін сындарлы диалогты жалғастыруға, ұзақ мерзімді ынтымақтастықты құруға өзара мүдделілік танытты.
Daryo: Қазақстан металлургия саласын дамытпақ
2025 жылы Қазақстанның Өнеркәсіп және құрылыс министрлігі металлургияда нақты көлем индексін 5%-ға, металл кендерін өндіруді 3,1%-ға ұлғайтуды көздеп отыр. Ал көмір өндіру көлемі болжамға сәйкес 2024 жылғы деңгейде қалады. Жаңалықты өзбекстандық Daryo таратты.
Экономикалық өсімді қамтамасыз ету жөніндегі штаб отырысында вице-премьер – ұлттық экономика министрі Серік Жұманғарин ведомствоға, сондай-ақ өңірлік билікке 2025 жылы тау-кен металлургия кешеніндегі (ТМК) НКИ көрсеткіштерін арттыру үшін шаралар қабылдауды тапсырды.
Металлургиядағы өсімді мыс, алтын, прокат, ферроқорытпа және шойын өндіру көлемін ұлғайту есебінен қамтамасыз ету жоспарланып отыр. Бұдан басқа, ағымдағы жылы «Karagandy Power Silicon» ЖШС кешенді қорытпалар зауытын, «Ekibastuz FerroAlloys» ЖШС ферроқорытпа өндірісін, «Shagala Mining» ЖШС катодты мыс өндірісін іске қосу және Лиманное кен орнын игеру күтілуде.
Жұманғарин 7% мақсатты экономикалық өсімге қол жеткізу үшін ТМК дамытудың жоспарланған көрсеткіштері жеткіліксіз болуы мүмкін екенін атап өтті.
Үкімет отырысында Батыс Қазақстан және Атырау облыстарындағы инвестициялық жобалардың іске асырылу барысы да қаралды. 2025 жылғы қаңтарда негізгі капиталға инвестициялар 28,9 млрд теңгені құрады, бұл 2024 жылдың сәйкес кезеңімен салыстырғанда 7,1%-ға артық (26,7 млрд теңге).
2025 жылға арналған негізгі көрсеткіш (KPI) – 841 млрд теңге. Тікелей шетелдік инвестициялардың ағыны 2024 жылдың 9 айында 995,5 млн долларға жетті.
2025 жылы 44,5 млрд теңгенің 25 инвестициялық жобасын жүзеге асыру жоспарланған, бұл 769 жұмыс орнын ашады. Негізгі жобалардың ішінде: «ATYRAU CHICKEN» ЖШС құс фабрикасы, «Айдана-Агро» жылыжай кешені, «Тексол-Транс» ЖШС сұйытылған газды сақтауға арналған қойма, «Жұмағалиева» ШҚ көкөніс қоймасы бар. Қазір инвестициялық жобаларды жүзеге асыруға айтарлықтай кедергілер жоқ.
Report: Қазақстан Бурабай курортын дамытуға 278 млн доллар бөледі
Қазақстан Үкіметі Щучинск-Бурабай курорттық туристік аймағын дамыту жоспарын бекітті. Жоспар шеңберінде туристік инфрақұрылымды, көліктік логистиканы, цифрлық шешімдерді, қауіпсіздік жүйесін дамытуға 137,2 млрд теңге ($278 млн) инвестиция тарту бойынша 100-ден астам іс-шара іске асырылатын болады. Ақпаратты әзербайжандық Report басылымы жазды.
Стратегиялық құжаттың басты мақсаты сырттан келетін туристер санын 35 мыңнан 94 мың адамға дейін ұлғайту болып белгіленді. Басқа мақсатты бағдарлар қатарында туризм саласындағы жұмыспен қамтуды 22 мыңнан 32,5 мың адамға дейін көбейту, 22,7 млрд теңге ($46 млн) жеке инвестициялар тарту, өңір экономикасындағы туризм үлесінің ұлғаюын 1,4%-ден 3,5%-ге дейін арттыру бар.
Қатаркөл көлінің жанында балалар орталықтарын, спорттық-сауықтыру кешендерін және жыл бойғы аквапарк ұйымдастыру жоспарлануда. Жукей көлі ауданында кемпингтер, глемпингтер, жаңа туристік бағыттар, ал Кіші Чебачьеде жалға беру станциялары, қайық станциялары, жағалау инфрақұрылымы мен жағажайлар пайда болады.
