Әлемдік БАҚ-тағы Қазақстан: мұнай жөніндегі болжам, Моңғолияға арналған локомотивтер
Осы аптада шетелдік бірқатар басылымда Қазақстан туралы көптеген материал жарияланды. Алматыдағы жер сілкінісі, Моңғолияға локомотив жеткізу және мұнайды өз еркімен азайту туралы мақалалар шықты. Халықаралық баспасөз Қазақстан туралы тағы не жазды – Kazinform тілшісінің шолуынан оқыңыз.
Reuters: Қазақстанның ең үлкен қаласында жер сілкінісі болды
Reuters агенттігі 2023 жылдың 4 наурызында Қазақстанның ең ірі қаласы Алматыда жер сілкінісі болып, дабыл қағылған кезде тұрғындар көшеге қауіпсіз жерге жүгіргенін хабарлады.
Қазақстанның Төтенше жағдайлар министрлігінің мәліметінше, Алматыда күші шамамен 5 балдық жер сілкінісі болды және ол көршілес Қырғызстан астанасы Бішкекте де сезілді, – деп жазды Reuters агенттігі.
Daryo: Қазақстанға 35-тен астам жаңа компания көшуі мүмкін
Өзбекстанның Daryo ақпарат порталы Қазақстан үкіметі шетелдік компанияларды – ірі кәсіпорындарды көшіріп жатқанын хабарлады. Тізімде 30-дан астам елден 400-ге жуық компания бар. Басылым бұл туралы Астанада өткен брифингте Ұлттық экономика вице-министрі Бауыржан Құдайбергеновтің мәлімдемесіне сілтеме жасап жазды.
Нақты нәтижелерге жеттік. Бүгінде құны 1,5 миллиард доллардан асатын 41 компания бар, бұл компанияларды бәріңіз білесіз. Бұл – InDriver, TikTok және т.б. Бүгінде 37 кәсіпорынмен жұмыс жүріп жатыр. Әзірге қай компаниялар екенін жарияламауымыз мүмкін. Жұмыстың қорытындысы шыққанда қосымша ақпарат беріледі, – деп келтіреді Құдайбергеновтің сөзін Daryo.
Вице-министр қазірдің өзінде Қазақстанға 41 компания көшірілгенін атап өтті. Ал 37 кәсіпорынды көшіру жыл соңына дейін аяқталады деп жоспарланған.
Azernews: Қазақстан 2024 жылға мұнай өндіру болжамын өзгертпейді
Azernews агенттігінің хабарлауынша, Қазақстан билігі ОПЕК+ келісімі бойынша өндіруді қысқарту жөніндегі міндеттемелеріне байланысты биылға мұнай өндіру болжамын қайта қарауды жоспарлап отырған жоқ. Бұл туралы ҚР энергетика министрі Алмасадам Сәтқалиев мәлімдеді.
Болжам өзгермейді. Ерікті міндеттемелер (ОПЕК+ шеңберінде) бірінші және екінші тоқсанда сол қалпында қалады, оның соңында біз мұнай нарығындағы баға конъюнктурасын және сұраныс пен ұсыныс теңгерімін қарастырамыз. Бұл көлемді жалпы алғанда келесі кезеңде өтеуге мүмкіндігіміз бар, – деп келтіреді Azernews Сәтқалиевтің сөзін.
Порталдың мәліметінше, бұған дейін Энергетика министрлігі осы жылдың соңында елімізде мұнай өндіру болжамы 90,3 млн тонна болатынын хабарлаған. 2024 жылдың наурызында бірқатар ОПЕК+ елі бастапқыда бірінші тоқсанға жоспарланған мұнай өндіруді қосымша ерікті қысқарту шараларын ұзарту туралы жазды. Сондай-ақ, Қазақстан мұнай өндіруді қосымша ерікті қысқарту мерзімін екінші тоқсанға дейін ұзартты.
The Times of Central Asia: Қазақстан мұнай өндіруді ерікті түрде қысқартуды тәулігіне 82 мың баррельге дейін ұзартады
The Times of Central Asia газетінде де Қазақстан мұнай өндіруді ерікті түрде қысқарту мерзімін 2024 жылдың екінші тоқсанының соңына дейін ұзарту шешімін қабылдағаны туралы мақала жарияланды. Ел үкіметі мұны сұраныс пен ұсыныс тепе-теңдігін сақтау және мұнай нарықтарының тұрақтылығын қамтамасыз ету үшін қабылдаған.
Осы кеңейтілген бастама аясында 2024 жылғы маусымның соңына дейін Қазақстанда мұнай өндіру тәулігіне 1,468 млн баррель болады. Болашақта бұл көлемдер нарықтағы тұрақтылықты сақтау үшін қайтарылады, – делінген The Times of Central Asia мақаласында.
Trend.az: Қазақстан Моңғолияға локомотивтер жібереді
Әзербайжанның Trend.az ақпарат агенттігінің хабарлауынша, Қазақстан Моңғолияға локомотивтер жеткізе бастады.
Бірінші партиямен Моңғолияға әрқайсысының құны 4 млн доллардан асатын төрт локомотив жіберілді. Индустрия министрлігінің мәліметінше, қазақстандық локомотивтерге қазірдің өзінде алты мемлекет: Тәжікстан, Өзбекстан, Украина, Молдова, Әзербайжан және Түрікменстан тапсырыс берген. Моңғолия Қазақстаннан локомотив сатып алған сегізінші ел болды, – деп жазды басылым ҚР Индустрия және құрылыс министрлігіне сілтеме жасап.
Агенттіктің хабарлауынша, 2023 жылы Қазақстан мен Моңғолия арасындағы тауар айналымы шамамен 133 млн доллар болды. Қазақстанның Моңғолияға экспорты басым – 124,3 млн доллар, ал Моңғолиядан $8,7 млн импорт келеді.
Eureporter: Қазақстан Анталия дипломатиялық форумына 2024 қатысты
Eureporter 2024 жылдың 1-3 наурызы аралығында Анталияда (Түркия) өткен Дипломатиялық форум туралы мақала жариялады. «Дипломатияны күйзеліс кезінде ілгерілету» тақырыбына арналған форумға 100-ден астам мемлекет басшылары және үкімет, сыртқы істер министрлері, халықаралық ұйымдардың, үкіметтік емес ұйымдар мен сарапшылық топтардың өкілдері қатысты.
Агенттіктің хабарлауынша, ашылу салтанатында Түркия президенті Режеп Тайип Ердоған күрделі жаһандық геосаяси жағдайында дипломатияны күшейту қажеттігін айтып, бұл мәселені шешудегі форумның маңызды рөлін атап өткен.
Сондай-ақ, Eureporter форумға ҚР премьер-министрінің орынбасары, сыртқы істер министрі Мұрат Нұртілеу қатысқанын жазды. «Түркі әлеміндегі институттандыру: ХХІ ғасырдағы Түркі мемлекеттерінің ұйымы (ТМҰ)» тақырыбына арналған панельдік сессияда Мұрат Нұртілеу Қазақстанның түркі әлеміндегі шешуші рөліне тоқталып, оның ТМҰ-ның бастамашысы және негізін қалаушы мүшесі ретіндегі мәртебесін, сондай-ақ оның аясындағы интеграцияны ілгерілетудегі белсенділігі туралы айтқан.
